ទីក្រុងម៉ានីល បានបញ្ជាក់ថា យោធាហ្វីលីពីន និងសហរដ្ឋអាមេរិក បានចាប់ផ្តើមសមយុទ្ធរួមគ្នា មានការចូលរួមពីទាហានចំនួន៥.០០០នាក់កាលពីថ្ងៃចន្ទដើមសប្ដាហ៍នេះ ប៉ុន្មានថ្ងៃមុនរដ្ឋមន្ត្រីការពារជាតិអាមេរិកថ្មីលោក Pete Hegseth គ្រោងបំពេញទស្សនកិច្ចទៅកាន់ប្រទេសនេះ។

ប្រតិបត្តិការរយៈពេលជាច្រើនសប្តាហ៍ ដែលជាការបើកដំណើរការនៃសមយុទ្ធ Balikatan កាន់តែធំ ដែលនឹងធ្វើឡើងនៅខែក្រោយ រួមមានកងទ័ពជើងទឹក និងទ័ពអាកាសរបស់ប្រទេសនេះ កើតឡើងទន្ទឹមភាពតានតឹងខ្លាំងជាមួយប្រទេសចិន ជុំវិញជម្លោះសមុទ្រចិនខាងត្បូង។ 

យោធាបាននិយាយក្នុងសេចក្តីថ្លែងការណ៍មួយថា កងទ័ពទាំងពីរប្រទេសនឹងផ្តោតលើ ការពង្រឹងប្រតិបត្តិការរួមគ្នា ការពង្រឹងសមត្ថភាពប្រយុទ្ធក្នុងសង្គ្រាម និងបង្ហាញពីការប្តេជ្ញាចិត្តទ្វេភាគីដ៏រឹងមាំក្នុងការការពារបូរណភាពទឹកដីរបស់ប្រទេសហ្វីលីពីន។  

កងទ័ពអាមេរិកបាននិយាយថា ខ្លួននឹងមិនអនុវត្តការសាកល្បងបាញ់គ្រាប់ពិតនៃប្រព័ន្ធមីស៊ីលយុទ្ធសាស្ត្រទីហ្វុង (Typhon)ដែលឈរជើងនៅក្នុងប្រទេសហ្វីលីពីនក្នុងអំឡុងពេលសមយុទ្ធយោធារួមប្រចាំឆ្នាំរបស់ពួកគេនាពេលខាងមុខនោះទេ។

លោក Hegseth គ្រោងជួបសមភាគីរបស់លោក Gilberto Teodoro នៅថ្ងៃសុក្រក្នុងទីក្រុងម៉ានីល ជាផ្នែកនៃដំណើរដែលនឹងនាំរូបលោកទៅកាន់សម្ព័ន្ធមិត្តសន្ធិសញ្ញាជប៉ុន។

នោះជាដំណើរទស្សនកិច្ចលើកដំបូងរបស់លោកនៅអាស៊ីចាប់តាំងពីលោកបានតែងតាំងដោយលោកប្រធានាធិបតី Donald Trump និងសវនាការបញ្ជាក់ពីព្រឹទ្ធសភា។

ទីក្រុងម៉ានីល និងវ៉ាស៊ីនតោន ដែលជាសម្ព័ន្ធមិត្តសន្ធិសញ្ញាដ៏យូរលង់មកហើយ បានពង្រឹងកិច្ចសហប្រតិបត្តិការការពារជាតិរបស់ខ្លួនកាន់តែស៊ីជម្រៅ ចាប់តាំងពីប្រធានាធិបតីហ្វីលីពីន Ferdinand Marcos បានឡើងកាន់តំណែងក្នុងឆ្នាំ ២០២២ ហើយបានចាប់ផ្តើមជំទាស់ការអះអាងសិទ្ធិដ៏ធំរបស់ទីក្រុងប៉េកាំងនៅសមុទ្រចិនខាងត្បូង៕