សេតវិមាន បាននិយាយកាលពីថ្ងៃចន្ទថា មន្ត្រីរដ្ឋបាលជាន់ខ្ពស់របស់លោក Trump បានបង្ហាញពីផែនការសង្រ្គាមដោយភ័នច្រឡំនៅក្នុងក្រុមផ្ញើសារដែលរួមមានទាំងអ្នកសារព័ត៌មាន ភ្លាមៗមុនពេលដែលសហរដ្ឋអាមេរិកវាយប្រហារទៅលើក្រុមហ៊ូទី ជាសម្ព័ន្ធមិត្តអ៊ីរ៉ង់នៅយេម៉ែន។

សមាជិកសភាគណបក្សប្រជាធិបតេយ្យ បានរិះគន់ភ្លាមៗចំពោះកំហុសនេះ ដោយនិយាយថា វាជាការរំលោភលើសន្តិសុខជាតិរបស់សហរដ្ឋអាមេរិក និងជាការបំពានច្បាប់ ដែលត្រូវតែស៊ើបអង្កេតដោយសភា។

លោក Jeffrey Goldberg និពន្ធនាយកនៃសារព័ត៌មាន The Atlantic បាននិយាយនៅក្នុងរបាយការណ៍មួយកាលពីថ្ងៃចន្ទថា លោកត្រូវបានអញ្ជើញដោយមិនដឹងខ្លួនកាលពីថ្ងៃទី១៣ ខែមីនា ចូលទៅក្នុងChat Group នៅលើកម្មវិធីផ្ញើសារមួយ» ។

នៅក្នុងក្រុមនេះ ទីប្រឹក្សាសន្តិសុខជាតិ លោក Mike Waltz បានប្រគល់ភារកិច្ចទៅឱ្យអនុប្រធានរបស់លោកឈ្មោះ Alex Wong ដោយបង្កើត «ក្រុមTiger Team» ដើម្បីសម្របសម្រួលចំណាត់ការរបស់សហរដ្ឋអាមេរិកប្រឆាំងក្រុមហ៊ូទី។

ប្រធានាធិបតីសហរដ្ឋអាមេរិក លោក Donald Trump បានចាប់ផ្តើមយុទ្ធនាការបន្តការវាយប្រហារយោធាទ្រង់ទ្រាយធំប្រឆាំងក្រុមហ៊ូទី នៅប្រទេសយេម៉ែន កាលពីថ្ងៃទី១៥ ខែមីនា ជុំវិញការវាយប្រហាររបស់ក្រុមនេះ ទៅលើការដឹកជញ្ជូនតាមសមុទ្រក្រហម ហើយលោកបានព្រមានអ៊ីរ៉ង់ ដែលជាអ្នកគាំទ្រដ៏សំខាន់របស់ក្រុមហ៊ូទី ថា ចាំបាច់ត្រូវតែបញ្ឈប់ការគាំទ្រក្រុមនេះជាបន្ទាន់។