ភ្នំពេញ៖ គិតត្រឹមឆ្នាំ២០២៤ រាជរដ្ឋាភិបាលកម្ពុជា តាមរយៈក្រសួងសង្គមកិច្ច អតីតយុទ្ធជន និង​យុវនីតិ​សម្បទា បានធ្វើបញ្ជីឈ្មោះសម្រាប់ប្រជាពលរដ្ឋ ដែលត្រូវទទួល​ប្រាក់​ឧបត្ថម្ភ​ពីក​ម្មវិ​ធី​ជាតិ​ជំនួយ​សង្គម ក្នុងគ្រួសារជាង ១លាននាក់ ដែលផ្ដោតលើគ្រួសារ និងមនុស្សចំនួន ៦ប្រភេទ ។

បើយោងតាមរបាយការណ៍ ដែលបង្ហាញក្នុងសន្និបាតបូកសរុបការងារប្រចាំ ឆ្នាំ២០២៤ និង​លើក​ទិស​ដៅ​អនុវត្តន៍នៅឆ្នាំ២០២៥ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា នៅ​ថ្ងៃ​ទី​២៥ ខែមីនា ឆ្នាំ២០២៥ បានឲ្យដឹងថា គ្រួសារដែលត្រូវទទួលសាច់ប្រាក់ពីកម្មវិធីនេះ រួម​មាន​គ្រួសារ​គោល​ជាង ៦២ម៉ឺនគ្រួសារ, ស្ត្រីមានផ្ទៃពោះជាង៣ម៉ឺន ៨ពាន់គ្រួសារ, កុមារអាយុ០-២ឆ្នាំ ជិត​២ម៉ឺននាក់, ជនចាស់ជរាជាង ៣០ម៉ឺននាក់, ជនមានពិការភាពជាង២ម៉ឺននាក់, និងអ្នក​ផ្ទុះ​មេរោគ​/ជំងឺអេដស៍ជាង ២ពាន់នាក់ ដោយសរុបជាទឹកប្រាក់អស់ចំនួនជាង៧៤លានដុល្លារ ។

របាយការណ៍បានបន្តថា គិតចាប់ពីថ្ងៃទី១ ខែមិថុនា ឆ្នាំ២០១៩ ដល់ថ្ងៃទី៥ ខែវិច្ឆិកា ឆ្នាំ២០២៤ រាជ​រដ្ឋាភិបាលបានឧបត្ថម្ភសាច់ប្រាក់ជូនស្ត្រីមានផ្ទៃពោះជាង ២៦ម៉ឺននាក់ និងកុមារ​ក្រោម​អាយុ​២​ឆ្នាំ ចំនួនជាង ១៣ម៉ឺននាក់ ដែលចំណាយថវិកាប្រមាណជាង ៤៦លានដុល្លារ ។ ដោយ​ឡែក​គិត​ពី​ចាប់ផ្ដើមអនុវត្តកម្មវិធី ដល់ថ្ងៃទី២៩ ខែវិច្ឆិកា ឆ្នាំ២០២៤ កម្មវិធីជាតិ​ជំនួយ​សង្គម​ផ្នែក​បណ្ដុះ​បណ្ដាល​ជំនាញវិជ្ជាជីវៈ និងបច្ចេកទេសសម្រាប់យុវជន មកពីគ្រួសារក្រីក្រ និងគ្រួសារ​ងាយ​រង​ហានិភ័យ មានយុវជនបានចុះឈ្មោះក្នុងកម្មវិធីជាង ២ម៉ឺននាក់ យុវជន​បាន​បញ្ចប់​ការ​សិក្សា​ជាង ៨ពាន់នាក់ និងយុវជនទទួលសាច់ប្រាក់ឧបត្ថម្ភជាង ១ម៉ឺននាក់ ចំណាយថវិកា​អស់​ជាង ១០ពាន់លានរៀល ។

ក្នុងឱកាសនោះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បាន​វាយតម្លៃខ្ពស់ ពីកិច្ចខិតខំរបស់ថ្នាក់ដឹកនាំ និងមន្ត្រីរបស់ក្រសួងគ្រប់លំដាប់ថ្នាក់ លើការ​អនុវត្ត​ការងារស្នូល ដើម្បីបម្រើផលប្រយោជន៍របស់ប្រជាពលរដ្ឋ ។

ជាមួយនេះ ឯកឧត្តមរដ្ឋមន្ត្រី បានជំរុញបន្ថែមដល់មន្ត្រី បន្តខិតខំ​ផ្ដល់​សេវា​សុខុមាល​ភាព​មនុស្ស​ចាស់​ សេវាកិច្ចការពារកុមារ កម្មវិធីបង្វែរអនីតិជន កម្មវិធីបន្សាប ព្យាបាល ស្ដារនីតិ​សម្បទាដ​ល់​ជន​រង​គ្រោះដោយសារគ្រឿងញៀន សេវាគាំពារជនរងគ្រោះ សេវាសុខុមាលភាព​ជន​មាន​ពិការ​ភាព​ ការងាររបបសន្តិសុខសង្គមសម្រាប់មន្ត្រីរាជការស៊ីវិល និងអតីតយុទ្ធជន ៕ អត្ថបទ បាន សុខរិទ្ធិ