កងទ័ពអ៊ីស្រាអែល បាននិយាយនៅថ្ងៃអង្គារនេះថា ខ្លួនបានវាយប្រហារម្តងទៀតទៅលើមូលដ្ឋានយោធាចំនួនពីរ នៅភាគកណ្តាលប្រទេសស៊ីរី មួយថ្ងៃបន្ទាប់ពីប្រមុខគោលនយោបាយការបរទេសរបស់សហភាពអឺរ៉ុប(EU ) បានព្រមានពីការវាយប្រហារនៅទីនោះ ហើយនៅក្នុងប្រទេសលីបង់ នឹងបង្កឲ្យមានការកើនឡើងភាពតានតឹងកាន់តែខ្លាំងឡើង។

យោធាអ៊ីស្រាអែល បាននិយាយថា៖«មួយរយៈពេលខ្លីកន្លងទៅនេះ  កងកម្លាំងការពារអ៊ីស្រាអែល (IDF) បានវាយលុកសមត្ថភាពយោធា ដែលនៅតែមាននៅមូលដ្ឋានយោធាស៊ីរី Tadmur និង T4» ដោយសំដៅទៅលើមូលដ្ឋាន នៅទីក្រុង Palmyra និងមួយទៀតមានចម្ងាយ ៥០គីឡូម៉ែត្រ (៣០ម៉ាយ) ភាគខាងលិចទីក្រុងនេះ។

យោធាបានបន្ថែមថា៖«កងកម្លាំងការពារអ៊ីស្រាអែល នឹងបន្តធ្វើសកម្មភាព ដើម្បីបញ្ឈប់ការគំរាមកំហែងណាមួយដែលបង្កឡើងចំពោះពលរដ្ឋរបស់រដ្ឋអ៊ីស្រាអែល» ។

អ៊ីស្រាអែលបាននិយាយកាលពីថ្ងៃសុក្រថា ខ្លួនបានវាយប្រហារមូលដ្ឋានដូចគ្នា បន្ទាប់ពីក្រុមឃ្លាំមើល  សង្គ្រាម បានរាយការណ៍ជាលើកដំបូងអំពីការវាយឆ្មក់ទាំងនេះ។

កាលពីថ្ងៃចន្ទ ក្នុងអំឡុងដំណើរទស្សនកិច្ចទៅកាន់ទីក្រុងហ្ស៊េរុយសាឡឹម ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas បានព្រមានថា ការវាយប្រហាររបស់អ៊ីស្រាអែលលើប្រទេសស៊ីរី និងលីបង់ កំពុងគំរាមកំហែងធ្វើឲ្យស្ថានការណ៍កាន់តែអាក្រក់ឡើង។

លោកស្រី Kallas បាននិយាយនៅក្នុងសន្និសីទសារព័ត៌មានរួមមួយ ជាមួយរដ្ឋមន្ត្រីការបរទេសអ៊ីស្រាអែល លោក Gideon Saar ថា៖«សកម្មភាពយោធា ត្រូវតែសមាមាត្រ ហើយការវាយប្រហាររបស់អ៊ីស្រាអែលទៅកាន់ប្រទេសស៊ីរី និងលីបង់ ប្រឈមនឹងការកើនឡើងភាពតានតឹងបន្ថែមទៀត»។