ចំហេះព្រៃដ៏សន្ធោសន្ធៅនៅតែបន្តក្នុងប្រទេសជប៉ុន និងកូរ៉េខាងត្បូង ដោយខេត្តចំនួនពីរនៃភាគខាងលិចជប៉ុន ក្នុងថ្ងៃអង្គារ (២៥ មីនា) នេះ បន្តរងគ្រោះពីចំហេះ ហើយបង្ខំអ្នកស្រុកមួយចំនួនត្រូវជម្លៀសចេញ បន្ថែមពីលើមនុស្សរាប់ពាន់នាក់ដែលត្រូវបានជម្លៀសរួចមកហើយ និងបានបំផ្លាញផ្ទះសម្បែងមួយចំនួន ខណៈក្រុមអ្នកពន្លត់អគ្គិភ័យរាប់រយនាក់បានទប់ទល់នឹងអណ្ដាតភ្លើងនៅតំបន់ភ្នំ។

នៅកូរ៉េខាងត្បូង ក្រុមអ្នកពន្លត់អគ្គិភ័យបានបង្កើតភាពធូរស្បើយខ្លះនាថ្ងៃអង្គារ (២៥ មីនា) ដដែលនេះ ដោយកំពុងខិតកាន់តែកៀកទៅនឹងការទប់ស្កាត់ចំហេះព្រៃដ៏ធំបំផុតនៅក្នុងតំបន់ភាគអាគ្នេយ៍របស់ប្រទេស បន្ទាប់ពីចំហេះដែលបណ្តាលមកពីខ្យល់ស្ងួត បានដុតបំផ្លាញផ្ទៃដីជាង ៣៦.០០០ហិកតា សម្លាប់មនុស្សជាច្រើននាក់ និងមនុស្សជាង ៥.០០០នាក់ត្រូវជម្លៀស។

នៅជប៉ុន ចំហេះព្រៃមួយក្នុងចំណោមចំហេះជាច្រើន បានផ្ទុះឡើងកាលពីថ្ងៃអាទិត្យចុងសប្ដាហ៍ នៅទីក្រុង Imabari ខេត្ត Ehime ហើយអាជ្ញាធរនិយាយថា គិតត្រឹមព្រឹកថ្ងៃអង្គារ អណ្ដាតភ្លើងបានឆេះផ្ទៃដីជាច្រើនរយហិកតា ដែលធ្វើឱ្យនោះជាចំហេះដ៏ធំបំផុតនៅក្នុងខេត្ត Ehime ចាប់តាំងពីឆ្នាំ១៩៨៩ មក។

ទន្ទឹមនឹងនេះ អ្នកពន្លត់អគ្គភ័យកូរ៉េខាងត្បូង រាប់ពាន់នាក់ រួមជាមួយនឹងរថយន្តរាប់រយគ្រឿង និងឧទ្ធម្ភាគចក្រជាង ១០០គ្រឿង ត្រូវបានដាក់ពង្រាយដើម្បីពន្លត់ចំហេះនៅក្នុងតំបន់ Sancheong និងតំបន់ជិតខាង Uiseong និងទីក្រុង Ulsan ដោយចំហេះភាគច្រើនត្រូវបានគ្រប់គ្រងគិតត្រឹមព្រឹកថ្ងៃអង្គារ ប៉ុន្តែក្រុមពន្លត់អគ្គិភ័យក៏កំពុងឆ្លើយតបនឹងចំហេះផ្សេងទៀតក្នុងតំបន់ភាគខាងត្បូងផងដែរ៕