អង្គការសហប្រជាជាតិ (UN) កាលពីថ្ងៃចន្ទ (ទី២៤ ខែមីនា) បានព្រមានថា ការកាត់បន្ថយជំនួយអន្តរជាតិ អាចនាំមកនូវការបញ្ចប់វឌ្ឍនភាពជាច្រើនទស្សវត្សរ៍ ក្នុងការប្រយុទ្ធប្រឆាំងនឹងមរណភាពកុមារ ហើយថែមទាំងកែប្រែនិន្នាការនេះទៀតផង។

ទោះបីជារបាយការណ៍ប្រចាំឆ្នាំរបស់អង្គការយូនីសេហ្វ (UNICEF) អង្គការសុខភាពពិភពលោក (WHO) និងធនាគារពិភពលោក មិនបានលើកឡើងចំៗពីសហរដ្ឋអាមេរិកក៏ដោយ ក៏វាបានចេញនៅពេលដែលរដ្ឋបាលរបស់លោកប្រធានាធិបតី Donald Trump បានលុបចោលកម្មវិធីភាគច្រើនដែលអនុវត្តដោយ USAID ដែលជាទីភ្នាក់ងារជំនួយក្រៅប្រទេសដ៏សំខាន់របស់អាមេរិក ដោយមានថវិកាប្រចាំឆ្នាំចំនួន ៤២,៨ពាន់លានដុល្លារ។

លោកស្រី Fouzia Shafique ជំនួយនាយកផ្នែកសុខភាពរបស់អង្គការយូនីសេហ្វ បានប្រាប់ទីភ្នាក់ងារសារព័ត៌មាន AFP ថា៖ «សហគមន៍សុខភាពពិភពលោក មិនអាចបង្ហាញពីកម្រិតនៃព្រួយបារម្ភរបស់ខ្លួនឲ្យបានគ្រប់គ្រាន់នោះទេ ចំពោះស្ថានភាពដែលយើងកំពុងឃើញ»។

របាយការណ៍ពីអង្គការទាំងនេះ បានព្រមានថា ផលវិបាកអាក្រក់បំផុត ដោយសារការកាត់ប្រាក់ជំនួយ នឹងមាននៅក្នុងប្រទេសដែលមានអត្រាមរណភាពទារកខ្ពស់បំផុតរួចទៅហើយ ដូចជានៅអនុតំបន់សាហារ៉ាអាហ្វ្រិក និងអាស៊ីខាងត្បូង។ របាយការណ៍បានឲ្យដឹងបន្ថែមថា៖ «និយាយឲ្យសាមញ្ញ ប្រសិនបើការគាំទ្រសម្រាប់សេវាសង្គ្រោះជីវិត មិនត្រូវបានទ្រទ្រង់នោះទេ ប្រទេសជាច្រើនអាចរំពឹងថា នឹងមានឡើងវិញនូវការស្លាប់របស់ទារកទើបនឹងកើត និងកុមារ»។

គួរដឹងថា ក្នុងឆ្នាំ២០២៣ អត្រាមរណភាពរបស់កុមារអាយុក្រោម ៥ឆ្នាំ បានបន្តធ្លាក់ចុះ ដោយមានការកត់ត្រាអត្រាមរណភាពចំនួន ៤.៨លាននាក់ ក្នុងនោះទារកទើបនឹងកើត ២,៣លាននាក់ដែលមានអាយុក្រោមមួយខែ។ ចំនួននៃការស្លាប់បែបនេះ បានធ្លាក់ចុះក្រោម ៥លាននាក់ជាលើកដំបូង ក្នុងឆ្នាំ២០២២ ហើយកំណត់ត្រាទាបថ្មីនេះ បង្ហាញពីការថយចុះ ៥២ភាគរយ គិតចាប់តាំងពីឆ្នាំ២០០០ មក។ ប៉ុន្តែលោកស្រី Shafique បានលើកឡើងដដែលៗថា «៤,៨លាន គឺជាចំនួនច្រើនពេកហើយ»៕