អ្នកស្រុក បានប្រាប់ទីភ្នាក់ងារសារព័ត៌មាន AFP ថា ការវាយប្រហារតាមអាកាសរបស់របបយោធាមីយ៉ាន់ម៉ាទៅលើគ្លីនិកវេជ្ជសាស្រ្ត នៅក្នុងភូមិដាច់ស្រយាលមួយ បានសម្លាប់មនុស្ស ១១នាក់ ក្នុងនោះរួមទាំងវេជ្ជបណ្ឌិត និងភរិយារបស់លោកផងដែរ។

សូមរំលឹកថា រដ្ឋប្រហារយោធាឆ្នាំ២០២១ បានធ្វើឲ្យប្រទេសមីយ៉ាន់ម៉ាធ្លាក់ចូលទៅក្នុងសង្រ្គាមស៊ីវិលដ៏បែកបាក់ រវាងរបបយោធា ទ័ពព្រៃប្រឆាំងរដ្ឋប្រហារ និងក្រុមប្រដាប់អាវុធជនជាតិភាគតិច ដែលជាប់នៅក្នុងស្ថានការណ៍ទាល់ច្រកដ៏អាក្រក់បំផុត នៅប្រទេសអាស៊ីអាគ្នេយ៍មួយនេះ។

អ្នកស្រុកបានប្រាប់ឲ្យដឹងថា ការវាយប្រហារតាមអាកាសកាលពីព្រឹកថ្ងៃទី២២ ខែមីនា បានត្រូវចំភូមិ Hnan Khar ភាគខាងលិចនៃតំបន់ Magway ជាតំបន់មួយដែលបច្ចុប្បន្នត្រូវបានគ្រប់គ្រងដោយកងកម្លាំងប្រឆាំងរដ្ឋប្រហារ។ អ្នកនាំពាក្យរបស់របបយោធាមីយ៉ាន់ម៉ា មិនអាចទាក់ទងសុំការអធិប្បាយបានទេ។

កាលពីថ្ងៃទី២៣ ខែមីនា អ្នកភូមិម្នាក់ បាននិយាយក្នុងលក្ខខណ្ឌមិនបញ្ចេញឈ្មោះថា «វា (យន្តហោះ) បានហោះទាបមែនទែន ហើយខ្ញុំបានឮសំឡេងគ្រាប់បែកផ្ទុះយ៉ាងខ្លាំង នៅពេលដែលយើងកំពុងសម្ងំលាក់ខ្លួន»។

សាក្សីដែលឃើញផ្ទាល់ភ្នែក និងបុរសទី២ មកពីតំបន់នោះ បាននិយាយថា វេជ្ជបណ្ឌិតម្នាក់ និងភរិយារបស់គាត់ ស្ថិតក្នុងចំណោមអ្នកស្លាប់ទាំង ១១នាក់ នៅពេលដែលការផ្ទុះ បានកម្ទេចគ្លីនិកបណ្ដោះអាសន្នដែលបើកដំណើរការនៅក្នុងផ្ទះមួយខ្នង។

ដោយសុំនិយាយ ក្នុងលក្ខខណ្ឌមិនបញ្ចេញឈ្មោះផងដែរ កាលពីថ្ងៃទី២៤ ខែមីនា អ្នកស្រុកមូលដា្ឋន បានប្រាប់ថា៖ «របបយោធាកំពុងវាយប្រហារញឹកញាប់ជាងមុន ជាមួយនឹងការវាយប្រហារតាមអាកាស ក្នុងរយៈពេលប៉ុន្មានខែថ្មីៗនេះ ហើយជនស៊ីវិលទាំងអស់មានការភ័យខ្លាចយ៉ាងខ្លាំង។ ពួកគេតែងតែស្តាប់សំឡេងយន្តហោះចម្បាំងយោធា ហើយត្រៀមខ្លួនរកកន្លែងលាក់ខ្លួន»។

យោងតាមអង្គការមិនរកប្រាក់ចំណេញដែលតាមដានទីតាំងជម្លោះប្រដាប់អាវុធ និងទិន្នន័យព្រឹត្តិការណ៍ (Acled) បានឲ្យដឹងថា ចំនួននៃការវាយប្រហារតាមផ្លូវអាកាសរបស់យោធាលើជនស៊ីវិល បានកើនឡើងបើធៀបនឹងឆ្នាំមុនៗ ក្នុងអំឡុងពេលមានសង្រ្គាមស៊ីវិលនេះ៕