នៅព្រឹកថ្ងៃអង្គារនេះ ក្រុមឧទ្ទាមហ៊ូទីយេម៉ែន បានអះអាងពីការវាយប្រហារមីស៊ីល និងយានដ្រូនជាបន្តបន្ទាប់ដែលមានគោលដៅលើអាកាសយានដ្ឋាន Ben Gurion នៅក្នុងប្រទេសអ៊ីស្រាអែល និងនាវាចម្បាំងសហរដ្ឋអាមេរិក នៅក្នុងសមុទ្រក្រហម ។

នៅក្នុងសេចក្តីថ្លែងការណ៍លើកញ្ចក់ទូរទស្សន៍ អ្នកនាំពាក្យយោធាហ៊ូទីលោក Yahya Sarea អះអាងថា កងកម្លាំងមីស៊ីលហ៊ូទី វាយប្រហារគោលដៅដោយជោគជ័យលើអាកាសយានដ្ឋាន Ben Gurion នៅក្នុងទីក្រុងតែល អាវីវ ដោយប្រើប្រាស់មីស៊ីលបាលីស្ទិក ២គ្រាប់ ។ 

មីស៊ីល ១គ្រាប់ក្នុងចំណោមមីស៊ីលទាំង ២គ្រាប់ ត្រូវបានគេកំណត់ថា ជាមីស៊ីល Dhulfiqar ខណៈមីស៊ីល១គ្រាប់ទៀត គឺជាមីស៊ីលល្បឿនលឿនជាងសំឡេង Palestine-2 ។

អ្នកនាំពាក្យរូបនេះបន្តថា ប្រតិបត្តិការខាងលើសម្រេចបានគោលដៅដោយជោគជ័យ តាមបំណងរបស់ព្រះ ។ លោកបានអះអាងផងដែរ ពីការវាយប្រហារលើគោលដៅនាវាចម្បាំងសហរដ្ឋអាមេរិកជាច្រើនគ្រឿងនៅក្នុងសមុទ្រក្រហម រួមទាំងនាវាដឹកយន្តហោះសហរដ្ឋអាមេរិក Truman ។

យោងតាមសេចក្តីថ្លែងការណ៍ បានឲ្យដឹងថា កងទ័ពជើងទឹក កងកម្លាំងមីស៊ីល និងកងកម្លាំងយានដ្រូន បានបើកការវាយប្រហារចម្រុះគោលដៅ ដោយប្រើប្រាស់មីស៊ីលបាលីស្ទីល មីស៊ីលតម្រង់គោលដៅ និងយានដ្រូន ។

លោក Yahya Saree បាននិយាយទៀតថា ប្រតិបត្តិការលើកនេះ ចំណាយពេលច្រើនម៉ោង ហើយនិងបានធ្វើឲ្យអាក់ខានដល់ការវាយប្រហារតាមច្រកអាកាសដែលយោធាសហរដ្ឋអាមេរិកត្រៀមវាយប្រហារប្រទេសយេម៉ែន ។

ខណៈពេលនោះដែរ យោធាអ៊ីស្រាអែល និយាយថា ខ្លួនបានបាញ់ស្កាត់មីស៊ីល ១គ្រាប់ពីលើអ៊ីស្រាអែលកាលពីថ្ងៃចន្ទដែលត្រូវបានបាញ់ចេញពីប្រទេសយេម៉ែន ។

សូមបញ្ជាក់ថា ក្រុមឧទ្ទាមហ៊ូទី បានបើកការវាយប្រហារជាង ១០០លើកលើការដឹកជញ្ជូនក្នុងសមុទ្រក្រហម ចាប់តាំងពីសង្រ្គាមអ៊ីស្រាអែលជាមួយក្រុមហាម៉ាសចាប់ផ្តើម កាលពីចុងឆ្នាំ ២០២៣ ដោយពួកគេអះអាងថា ពួកគេវាយប្រហារបែបនេះ ដើម្បីបង្ហាញសាមគ្គីភាពជាមួយជនប៉ាឡេស្ទីននៅតំបន់ហ្កាហ្សា ៕