រដូវផ្កាសាគូរ៉ារីក ក្នុងទីក្រុងតូក្យូ ប្រទេសជប៉ុន បានចាប់ផ្ដើមកាលពីថ្ងៃចន្ទ (ទី២៤ ខែមីនា) ដោយនេះជាការចូលរដូវកាលលឿនជាងឆ្នាំមុនចំនួន ៥ថ្ងៃ ខណៈដែលទីភ្នាក់ងារឧតុនិយម បានប្រកាសថា ផ្កាដើមសាគូរ៉ា នៅទីសក្ការបូជា Yasukuni បានរីកហើយ។

ប្រភេទផ្កា Somei-Yoshino ដែលត្រូវបានគេស្គាល់ថា ជាផ្កាពណ៌ផ្កាឈូករាងស្លេក ត្រូវបានប្រើជាសញ្ញាសម្គាល់ផ្លូវការ សម្រាប់ការប្រកាសរបស់ទីភ្នាក់ងារ។ ទិន្នន័យត្រូវបានប្រមូលពីដើមឈើចំនួន ៥៨ដើម ដែលត្រូវបានជ្រើសរើសជាមុន នៅទូទាំងប្រទេស ដោយការប្រកាសរបស់ទីក្រុងតូក្យូ កំណត់គំរូតែមួយ នៅឯទីសក្ការៈបូជា ក្នុងតំបន់ Chiyoda Ward។

នៅវេលាម៉ោងប្រហែល ២រសៀល ម៉ោងក្នុងស្រុក នាថ្ងៃចន្ទនោះ ទីភ្នាក់ងារបានប្រកាសថា ផ្កានៃដើមឈើដ៏ល្បីឈ្មោះនេះ បានរីកជាផ្លូវការ។ ទីភ្នាក់ងារនេះចាត់ទុកដើមឈើមួយដើមថា បានចេញផ្កានៅពេលដែលផ្កា ៥ ឬ៦ទង នៅលើធាងរបស់វា បានបើកស្រទាប់។ ការរីកពេញបរិបូរ ត្រូវបានប្រកាសនៅពេលដែលប្រហែល ៨០ភាគរយនៃផ្ការបស់ដើមឈើនេះ បានបើកស្រទាប់របស់វា។

យោងតាមសមាគមអាកាសធាតុជប៉ុន បានឲ្យដឹងថា អាកាសធាតុក្ដៅល្មម កាលពីសប្តាហ៍កន្លងមកនេះ ត្រូវបានគេជឿថា បានជួយឲ្យមានផ្ការីក។ ពេលវេលារីកពេញបរិបូរ ត្រូវបានគេព្យាករថា នឹងមានរយៈពេលប្រហែល ១សប្តាហ៍ ឬអាចនឹងឆាប់ជាងនេះ ប្រសិនបើស្ថានភាពអាកាសធាតុក្ដៅល្មម នៅតែបន្តមាន៕