ក្រុមគ្រូពេទ្យប៉ាឡេស្ទីន បាននិយាយថា ការវាយប្រហាររបស់អ៊ីស្រាអែល បានសម្លាប់មនុស្សយ៉ាងហោចណាស់ ២៣នាក់ នៅតំបន់ហ្កាហ្សាស្ទ្រីប នៅពេលយប់ឆ្លងចូលថ្ងៃអង្គារ។

អ្នកស្លាប់រួមមានកុមារ បីនាក់ និងឪពុកម្តាយរបស់ពួកគេ ដែលត្រូវបានសម្លាប់ នៅក្នុងការវាយប្រហារលើតង់របស់ពួកគេ នៅជិតទីក្រុង Khan Younis ភាគខាងត្បូង។ នេះបើយោងតាមមន្ទីរពេទ្យ Nasser ដែលបានទទួលអ្នកស្លាប់ និងរងរបួស ចាប់តាំងពីអ៊ីស្រាអែល បានបន្តការវាយប្រហារយ៉ាងធ្ងន់ធ្ងរលើតំបន់ហ្កាហ្សា កាលពីសប្តាហ៍មុន ដោយបានធ្វើឲ្យបរាជ័យនូវបទឈប់បាញ់ ដែលបានបញ្ឈប់សង្រ្គាមរយៈពេល ១៧ខែនេះ។

យុទ្ធនាការរបស់អ៊ីស្រាអែលនៅតំបន់ហ្កាហ្សា បានសម្លាប់ជនជាតិប៉ាឡេស្ទីនជាង ៥០.000នាក់ និងរបួសជាង ១១៣.000នាក់ នេះបើយោងតាមក្រសួងសុខាភិបាល ដែលមិនបាននិយាយថា មានចំនួនជនស៊ីវិល ឬយុទ្ធជនប៉ុន្មាននោះទេ។ អ៊ីស្រាអែលនិយាយថា ខ្លួនបានសម្លាប់ក្រុមសកម្មប្រយុទ្ធប្រហែល២០.០០០នាក់ ដោយមិនបានផ្តល់ភ័ស្តុតាង។

អ៊ីស្រាអែលបានចាប់ផ្តើមយុទ្ធនាការ ដោយប្តេជ្ញាថា នឹងកម្ទេចក្រុមហាម៉ាស បន្ទាប់ពីការវាយប្រហាររបស់ខ្លួន កាលពីថ្ងៃទី ០៧ ខែតុលា ឆ្នាំ ២០២៣ ទៅលើភាគខាងត្បូងអ៊ីស្រាអែល ដែលក្នុងនោះក្រុមសកម្មប្រយុទ្ធ បានសម្លាប់មនុស្សប្រហែល ១.២០០នាក់ និងចាប់ពង្រត់ ២៥១ នាក់។ អ៊ីស្រាអែលនិយាយថា ខ្លួនកំណត់គោលដៅទៅលើក្រុមសកម្មប្រយុទ្ធ និងបន្ទោសក្រុមហាម៉ាសចំពោះការស្លាប់ជនស៊ីវិល ដោយសារតែក្រុមនេះ ប្រតិបត្តិការនៅក្នុងតំបន់ ដែលមានប្រជាជនរស់នៅច្រើន។