​បាល់ទាត់៖ ​ខ្សែប្រយុទ្ធ​អា​ហ្ស​ង់​ទីន និង PSG, Lionel Messi បាន​ក្លាយជា​ម្ចាស់​ជ័យលាភី​កីឡាករ​ឆ្នើម​បំផុត​ប្រចាំឆ្នាំ Ballon d’Or ជា​លើក​ទី៧ ក្រោយ​ទទួលបាន​សំលេងគាំទ្រ​ច្រើនជាងគេ​នៅ​ពីលើ Robert Lewandwoski និង Jorginho​។ ​​កីឡាករ​វ័យ ៣៤ឆ្នាំ​រូបនេះ​បាន​ជួយ​ក្រុម​ជំរើសជាតិ​អា​ហ្ស​ង់​ទីន​ឈ្នះ​ពាន Copa America ដែលជា​ពាន​ដំបូង​របស់ Messi ជាមួយ​ក្រុម​ជំរើសជាតិ និង​បូក​រួមទាំង​ស៊ុត​បញ្ចូល​ទី ៤០គ្រាប់​ក្នុង​ឆ្នាំ២០២១ ដែល​រួមមាន ២៨គ្រាប់​ឱ្យ Barcelona, ៤គ្រាប់​ឱ្យ Paris Saint Germain និង ៨គ្រាប់​ឱ្យ​ក្រុម​ជំរើសជាតិ​អា​ហ្ស​ង់​ទីន​។

​​ចំណែក​ខ្សែប្រយុទ្ធ Bayern Munich, Robert Lewandowski បាន​ត្រឹម​ចំណាត់ថ្នាក់​លេខ ២, លេខ ៣ Jorginho របស់​ក្រុម​តោ​ខៀវ Chelsea និង​លេខ ៤ ខ្សែប្រយុទ្ធ Real Madrid, Karim Benzema​។​ ​​ការ​ប្រគល់​ពាន​ជ័យលាភី​ឯកត្តជន​ប្រចាំ​ឆ្នាំ Ballon d’Or ត្រូវ​បាន​បោះឆ្នោត​ដោយ​អ្នកសារព័ត៌មាន ១៨០នាក់​ជុំវិញ​ពិភពលោក តែ​ឆ្នាំមុន​ត្រូវ​បាន​លុបចោល​ដោយសារ Covid-19​។​ ​​Lionel Messi និង Cristiano Ronaldo តែងតែ​ឈ្នះ​ពាន​នេះ​ជាប្រចាំ​គិតពី​ឆ្នាំ២០០៨ ដល់ ២០១៩ លើកលែង ២០១៨ មួយ​ដែល​ឈ្នះ​ដោយ​ខ្សែបម្រើ​ក្រូ​អាស៊ី Luka Modric​។​ ​​Lionel Messi ជា​កីឡាករ​ដែល​ឈ្នះ​ពាន​នេះ​ច្រើន​បំផុត​ក្នុង​ប្រវត្តិសាស្ត្រ​ដែល​រួម​មាននៅ​ឆ្នាំ២០០៩, ២០១០, ២០១១, ២០១២, ២០១៥, ២០១៩ និង ២០២១ នេះ​។ ​​ក្រោយ​ទទួល​បាន​ពាន Lionel Messi ក៏បាន​និយាយ​កោតសរសើរ​ខ្សែប្រយុទ្ធ​ប៉ូឡូញ Robert Lewandowski ដែរ​ថាគេ​សប្បាយចិត្ត​តែ Lewandowski សម​នឹង​ឈ្នះ​ពាន​នេះ​ដែរ​។

​​Robert Lewandowski ដែល​បាន​ស៊ុត​បញ្ចូល​ទី​សរុប ៥៣គ្រាប់​ឱ្យ Bayern Munich នោះ​ក៏បាន​ឈ្នះ​ពាន​ថ្មី​មួយ​ដែរ​គឺ​ខ្សែប្រយុទ្ធ​ឆ្នើម​បំផុត​ប្រចាំឆ្នាំ​។ ​​ចំណែក​ពាន​ផ្សេងៗ​ទៀត Gianluigi Donnarumma ឈ្នះ​ពាន​អ្នកចាំទី​ឆ្នើម​ប្រចាំឆ្នាំ​ក្រោយ​ជួយ​ក្រុម​ជំរើសជាតិ​អ៊ីតាលី​ឈ្នះ​ពាន Euro ២០២០​។ ​​Chelsea បានឈ្នះ​ពាន​ក្លិប​បាល់ទាត់​ល្អ​បំផុត​ប្រចាំឆ្នាំ​ផង​ក្រោយ​ឈ្នះ​ជើងឯក UEFA Champions League​។​ ​​សូមបញ្ជាក់ថា ​កីឡាករ ៣០​នាក់​ដែល​ស្ថិត​ក្នុង​បញ្ជី​បោះឆ្នោត​ឈ្នះ​ពាន Ballon d’Or មាន​កីឡាករ ១៤​នាក់​នៅ​ក្រប​ខណ្ឌ English Premier League ដែល​ក្នុង​នោះ​មាន Chelsea ៥នាក់ N’Golo Kante លេខ ៥, Romelu Lukaku បាន​លេខ ១២, Mason Mount លេខ ១៩, Cesar Azpilicueta លេខ ២៩​។ ​​Manchester City មាន Kevin de Bruyne លេខ ៨, Raheem Sterling លេខ ១៥, Riyad Mahrez លេខ ២០, Phil Foden លេខ ២៥ និង Ruben Dias លេខ ២៦​។ ​​Manchester United មាន​ពីរ​នាក់​គឺ Cristiano Ronaldo លេខ ៦ និង Bruno Fernandes លេខ ២១ ខណៈ Mohamed Salah លេខ ៧ និង Harry Kane លេខ ២៣​។ ​​រីឯ​ខ្សែបម្រើ​អេ​ស្ប៉ា​ញ​វ័យ ១៩ឆ្នាំ Pedri ឈ្នះ​ពាន​កីឡាករ​យុវជន​អាយុ​ក្រោម ២១ឆ្នាំ​ឆ្នើម​បំផុត​ប្រចាំឆ្នាំ​តាម​ពីក្រោយ​ដោយ Jude Bellingham, Mason Greenwood និង Bukayo Saka៕

​អត្ថបទ​៖​នាង សុភា​វុ​ធ