ប្រធានមន្ទីរបញ្ចកោណលោក Pete Hegseth បានបដិសេធរបាយការណ៍កាលពីថ្ងៃច័ន្ទ ទាក់ទងនឹងការលេចធ្លាយទិន្នន័យពាក់ព័ន្ធនឹងការវាយប្រហារដោយយោធាអាមេរិក នៅក្នុងប្រទេសយេម៉ែន។

លោកបានប្រាប់សារព័ត៌មាន Fox News ក្នុងការឆ្លើយតបទៅនឹងការសាកសួររបស់អ្នកកាសែតអំពីព័ត៌មានដែលបង្ហាញថា លោក Jeffrey Goldberg ដែលជានិពន្ធនាយកនៃទស្សនាវដ្តី The Atlantic ត្រូវបានរួមបញ្ចូលដោយចៃដន្យនៅក្នុងការជជែកជាក្រុម ដែលពិភាក្សាអំពីការវាយប្រហារលើក្រុមឧទ្ទាមហ៊ួទី មកពីចលនា Ansar Allahថា «គ្មាននរណាម្នាក់ កំពុងផ្ញើសារអំពីផែនការសង្គ្រាមនោះទេ» ។

លោក Jeffrey Goldbert បានអះអាងមុននេះថា មន្ត្រីជាន់ខ្ពស់នៅក្នុងរដ្ឋបាលសហរដ្ឋអាមេរិក បានបញ្ចូលខ្លួនដោយចៃដន្យ នៅក្នុងការជជែកជាក្រុម ដែលការពិភាក្សាកំពុងកើតឡើង ទាក់ទងនឹងការវាយប្រហារប្រឆាំងនឹងក្រុមហ៊ួទីមកពីចលនាឧទ្ទាម Ansar Allah ។

យោងតាមអត្ថបទរបស់លោក Goldberg កាលពីថ្ងៃទី ១១ ខែមីនា លោកបានទទួលសំណើ ដើម្បីចូលរួមវេទិកាផ្ញើសារ Signal ពីអ្នកប្រើប្រាស់ ដែលមានឈ្មោះហៅក្រៅថា «Mike Waltz» (ឈ្មោះរបស់ទីប្រឹក្សាសន្តិសុខជាតិ)។ ពីរថ្ងៃក្រោយមក អ្នកសារព័ត៌មានរូបនេះ ត្រូវបានជូនដំណឹងថា ខ្លួនត្រូវបានដាក់បញ្ចូល ទៅការជជែកជាក្រុម។ លោកបានបញ្ជាក់ថា ការជជែកនោះ មានអ្នកចូលរួមប្រមាណ ១៨នាក់ ក្នុងនោះមានអ្នកប្រើឈ្មោះ «J.D. Vance» (ឈ្មោះរបស់អនុប្រធានាធិបតីសហរដ្ឋអាមេរិក)។