ភ្ញៀវទេសចរបានជួបជុំគ្នានៅក្នុងសួនផ្កា“Badam Vaer” ដើម្បីទស្សនាផ្ការីកយ៉ាងស្គុះស្គាយ ស្ថិតនៅតំបន់កាស្មៀ ប្រទេសឥណ្ឌា ក៏ដូចជាទទួលបានទស្សនីយភាពដ៏អស្ចារ្យរបស់ផ្ការីកទាំងអស់នេះ ។

ទិដ្ឋភាពបែបនេះ ស្រដៀងគ្នានឹងនៅប្រទេសជប៉ុន ផងដែរ នៅពេលដែលរដូវផ្ការីកសាគូរ៉ា ចាប់ផ្តើម នៅតាមតំបន់ជាច្រើននៅក្នុងប្រទេសមួយនេះ ។ រដូវផ្កាសាគូរ៉ារីក ក្នុងទីក្រុងតូក្យូ បានចាប់ផ្ដើមកាលពីថ្ងៃចន្ទ ម្សិលមិញ ពោលគឺវារីកមុនរដូវ ៥ថ្ងៃ បើធៀបនឹងកាលពីឆ្នាំមុន ខណៈដែលទីភ្នាក់ងារឧតុនិយម បានប្រកាសថា ផ្កាសាគូរ៉ា នៅទីសក្ការបូជា Yasukuni បានរីកពេញហើយ ។

អ្នកនាង Shruti Pathari គឺជាភ្ញៀវទេសចរមួយរូបនិយាយថា ទីនេះមានសភាពស្ងប់ស្ងាត់ ស្រស់បំព្រង ប្រៀបបាននឹងឋានសួគ៌សម្រាប់ពួកយើងអញ្ចឹង ។

លោក Arup Das គឺជាភ្ញៀវទេសចរមួយរូបទៀតដែលបានចំណាយពេលចុងសប្តាហ៍នៅក្នុងសួនផ្កាជាមួយគ្រួសាររបស់លោក រៀបរាប់ថា បរិយាកាសនៅទីនេះ ពិតជាអស្ចារ្យខ្លាំងណាស់ ។

លោកថា វាពិតជាមានអារម្មណ៍ស្រស់ស្រាយខ្លាំងណាស់ ពេលដែលដើមផ្កាដាំក្នុងចំនួនដ៏ច្រើនបែបនេះ នៅកណ្តាលទីក្រុង ហើយជាពិសេសគឺអាកាសធាតុតែម្តង វាពិតជាអំណោយផលមែនទែន ៕