ការវាយប្រហារដាច់ដោយឡែកពីគ្នារបស់អ៊ីស្រាអែលលើតំបន់ហ្កាហ្សាស្ទ្រីប បានសម្លាប់បុគ្គលិកប្រព័ន្ធផ្សព្វផ្សាយ ២នាក់ ក្នុងនោះមានម្នាក់ជាបុគ្គលិករបស់សារព័ត៌មាន Al Jazeera។

លោក Hossam Shabat អ្នកសារព័ត៌មានដែលធ្វើការឲ្យប្រព័ន្ធផ្សព្វផ្សាយ Al Jazeera Mubasher ត្រូវបានសម្លាប់ នៅភាគខាងជើងតំបន់ហ្កាហ្សា កាលពីថ្ងៃចន្ទ (ទី២៤ ខែមីនា)។ សាក្សីបានប្រាប់បណ្តាញព័ត៌មានថា រថយន្តរបស់ជនរងគ្រោះត្រូវបានវាយប្រហារ នៅភាគខាងកើតនៃទីក្រុង Beit Lahiya។

ដោយធ្វើសេចក្ដីរាយការណ៍ពីទីក្រុង Deir el-Balah នៅភាគកណ្តាលតំបន់ហ្កាហ្សា លោក Tareq Abu Azzoum របស់សារព័ត៌មាន Al Jazeera បានប្រាប់ថា លោក Shabat វ័យ ២៣ឆ្នាំ បានរងរបួសនៅមុននោះ ក្នុងអំឡុងពេលមានការវាយប្រហាររបស់អ៊ីស្រាអែលមួយផ្សេងទៀត «ប៉ុន្តែរូបគេបានទទូចបន្តការរាយការណ៍ព័ត៌មាន» នៅក្នុងតំបន់ហ្កាហ្សា។

សហសេវិករបស់លោក Shabat បានចែករំលែកសារចុងក្រោយរបស់លោក។ តាមរយៈការបង្ហោះ នៅលើបណ្ដាញសង្គម X ដែលត្រូវបានសរសេរទុកមុន លោក Shabat បានសរសេរថា៖ «ប្រសិនបើអ្នកកំពុងអានវា (សារ) មានន័យថា ខ្ញុំត្រូវបានសម្លាប់ហើយ ពោលគឺភាគច្រើត្រូវបានកំណត់គោលដៅ ដោយកងកម្លាំងកាន់កាប់ដែនដីរបស់អ៊ីស្រាអែល»។

កាលពីព្រឹកថ្ងៃចន្ទនោះដែរ ការវាយប្រហាររបស់កងទ័ពអ៊ីស្រាអែលទៅលើទីក្រុង Khan Younis នៅភាគខាងត្បូងហ្កាហ្សា ក៏បានសម្លាប់អ្នកសារព័ត៌មានឈ្មោះ Mohammad Mansour ដែលធ្វើការឲ្យសារព័ត៌មាន Palestine Today។

បើយោងតាមការិយាល័យរដ្ឋបាលប្រព័ន្ធផ្សព្វផ្សាយ (GMO) នៅទីក្រុងហ្កាហ្សា បានឲ្យដឹងថា ការសម្លាប់អ្នកសារព័ត៌មានទាំង ២រូប នាំឲ្យចំនួនឡើងដល់ ២០៨នាក់ហើយ សម្រាប់បុគ្គលិកប្រព័ន្ធផ្សព្វផ្សាយដែលត្រូវបានសម្លាប់ ក្នុងការវាយប្រហាររបស់អ៊ីស្រាអែលលើតំបន់ហ្កាហ្សា គិតចាប់តាំងពីខែតុលា ឆ្នាំ២០២៣ មក។

នៅក្នុងសេចក្តីថ្លែងការណ៍មួយកាលពីថ្ងៃចន្ទ GMO បានលើកឡើងថា ខ្លួន «សូមថ្កោលទោសយ៉ាងខ្លាំងក្លា ចំពោះការកំណត់គោលដៅវាយប្រហារ ការសម្លាប់ និងការធ្វើឃាតអ្នកសារព័ត៌មានប៉ាឡេស្ទីន ដោយកងកម្លាំងកាន់កាប់របស់អ៊ីស្រាអែល» ហើយបានអំពាវនាវឲ្យក្រុមតស៊ូមតិសារព័ត៌មានថ្កោលទោស ចំពោះ «ឧក្រិដ្ឋកម្មជាប្រព័ន្ធទាំងនេះលើអ្នកសារព័ត៌មានប៉ាឡេស្ទីន និងប្រព័ន្ធផ្សព្វផ្សាយអាជីព នៅហ្កាហ្សា៕