រដ្ឋមន្ត្រីការពារជាតិន័រវេស បានលើកឡើងថា លោកជឿថា សហរដ្ឋអាមេរិកនៅតែមានការប្តេជ្ញាចិត្ត ចំពោះវិស័យការពារជាតិរបស់អឺរ៉ុប ប៉ុន្តែទ្វីបនេះ ត្រូវតែទទួលខុសត្រូវលើការចំណាយឲ្យច្រើនបន្ថែមទៀត ដើម្បីការការពារខ្លួន ប្រសិនបើទីក្រុងវ៉ាស៊ីនតោន នឹងបំពេញតាមការសន្យាផ្ដល់សន្តិសុខរបស់ខ្លួន។

គួរបញ្ជាក់ថា ការគាំទ្ររបស់អាមេរិក សម្រាប់វិស័យការពារជាតិ នៅអឺរ៉ុប បានក្លាយជាសំណួរមួយ នាពេលថ្មីៗនេះ ខណៈដែលប្រធានាធិបតីអាមេរិក លោក Donald Trump បាននិយាយថា ប្រទេសជាសមាជិករបស់អង្គការសន្ធិសញ្ញាអាត្លង់ទិកខាងជើង ឬអង្គការណាតូ (NATO) ត្រូវតែដំឡើងការចំណាយលើវិស័យការពារជាតិដល់ ៥ភាគរយនៃផលិតផលក្នុងស្រុកសរុប (GDP) ពោលគឺខ្ពស់ជាងកម្រិតគោលដៅ ២ភាគរយ នាពេលបច្ចុប្បន្ន ហើយបានបញ្ជាក់ថា សហរដ្ឋអាមេរិកប្រហែលជាមិនផ្ដល់ការការពារ ដោយសារការចំណាយមិនដល់កម្រិតទាំងនោះទេ។

ជាមួយគ្នានេះ ជំហររបស់លោក Trump ចំពោះអ៊ុយក្រែនដែលកំពុងជួបការលំបាក ក្នុងប្រយុទ្ធជាមួយការលុកលុយរបស់រុស្ស៊ី ក៏ជាកង្វល់មួយដែរ។ ប៉ុន្តែប្រទេសន័រវេស ដែលជាសមាជិកស្ថាបនិកនៃអង្គការណាតូ និយាយថា ការគាំទ្ររបស់សហរដ្ឋអាមេរិក ចំពោះអឺរ៉ុបនៅតែមានស្ថិរភាព។

លោក Tore O. Sandvik បាននិយាយនៅក្នុងបទសម្ភាសន៍មួយថា៖ «ពួកយើងមិនបានឃើញថា ការគាំទ្ររបស់សហរដ្ឋអាមេរិក កំពុងបាត់បង់ទៅនោះទេ»។ ដោយសំដៅដល់សន្ធិសញ្ញាអាត្លង់ទិកខាងជើង ដែលបញ្ជាក់ពីសន្តិសុខសមូហភាព លោកបានបន្ថែមថា៖ «យើងទទួលបានការបញ្ជាក់អះអាងទាំងពីរដ្ឋមន្ត្រីការពារជាតិ លោក Pete Hegseth និងពីលោក Trump ផ្ទាល់ ទៅកាន់មេដឹកនាំអឺរ៉ុបមួយចំនួនថា សហរដ្ឋអាមេរិក ប្ដេជ្ញាចិត្តគាំទ្រមាត្រា ៥»។

លោក Sandvik បានបញ្ជាក់ថា៖ «សម្រាប់អ្នកដែលភ័យខ្លាចថា សហរដ្ឋអាមេរិកនឹងមិនមានវត្តមាន នៅពេលត្រូវការចាំបាច់ ចម្លើយ គឺថា បង្កើនការទទួលខុសត្រូវ សម្រាប់សន្តិសុខផ្ទាល់ខ្លួនរបស់អ្នក។ អឺរ៉ុបត្រូវតែទទួលខុសត្រូវចំណែកធំនៃការចំណាយផ្នែកវិស័យការពារជាតិ ដើម្បីឲ្យសហរដ្ឋអាមេរិកបំពេញតាមការប្តេជ្ញាចិត្តរបស់ខ្លួន»៕