យោងតាមអង្គភាពព័ត៌មានរុស្ស៊ី និងក្រុមមន្រ្តី បានឲ្យដឹងថា ការវាយប្រហារដោយរ៉ុក្កែតរបស់អ៊ុយក្រែន បានសម្លាប់មនុស្ស ៦នាក់ រួមទាំងអ្នកសារព័ត៌មានរុស្ស៊ី ៣នាក់ផងដែរ នៅតំបន់ Luhansk របស់អ៊ុយក្រែនកាន់កាប់ដោយរុស្ស៊ី ។

លោក Leonid Pasechnik គឺជាអភិបាលតំបន់ Luhansk តែងតាំងឡើងដោយទីក្រុងម៉ូស្គូ និយាយថា ការវាយប្រហារកាលពីថ្ងៃចន្ទ បានសម្លាប់អ្នកឆ្លើយឆ្លងព័ត៌មានសង្រ្គាម Alexander Fedorchak ដែលជាអ្នកសារព័ត៌មានមកពីកាសែតរុស្ស៊ី Izvestia គាំទ្រដោយវិមានក្រឹមឡាំង កាមេរ៉ាមែន Andrei Panov បម្រើការងារឲ្យទូរទស្សន៍រុស្ស៊ី Zvezda ក៏ដូចជាលោក Alexander Sirkeli ដែលជាអ្នកបើកបររបស់ទូរទស្សន៍មួយនេះ ។

លោក Pasechnik និយាយថា ក្មេងអាយុ ១៤ឆ្នាំម្នាក់ ត្រូវបានសម្លាប់ផងដែរនៅក្នុងការវាយប្រហារលើស្រុក Kremina នៃតំបន់ Luhansk ។

លោក Izvestia និយាយថា លោក Fedorchak បានចូលក្នុងតំបន់ Luhansk ដែលភាគច្រើនគ្រប់គ្រងដោយទាហានរុស្ស៊ី ក្រោយធ្វើសេចក្តីរាយការណ៍ពីទីក្រុង Kupiansk ស្ថិតក្នុងតំបន់ជិតខាង Kharkiv គឺជាតំបន់មួយដែលកងកម្លាំងរុស្ស៊ី បានរុលចូល និងប៉ះទង្គិចគ្នាជាមួយទាហានអ៊ុយក្រែន ក្នុងរយៈពេលប៉ុន្មានខែចុងក្រោយនេះ ។

កាសែត Izvestia រាយការណ៍ថា លោក Alexander ត្រូវបានសម្លាប់ នៅក្នុងតំបន់ប្រតិបត្តិការសឹកពិសេសរបស់រុស្ស៊ីនៅប្រទេសអ៊ុយក្រែន ៕