«ក្មេងស្រីៗ គួរតែយកចិត្តទុកដាក់ខ្លាំង ក្នុងការចាប់យកបច្ចេកវិទ្យាឌីជីថល និងនវានុវត្តន៍ ដើម្បីជួយជំរុញវិស័យនេះឱ្យកាន់តែលឿន»។ ខាងលើនេះជាប្រសាសន៍លើកឡើងរបស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ថ្លែងក្នុងវេទិកាផ្សព្វផ្សាយស្តីពីវឌ្ឍនភាពនៃវិស័យឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នាព្រឹកថ្ងៃទី២៥ខែមីនា នៅវិមានរដ្ឋសភា។

សម្តេចប្រធានរដ្ឋសភា បានបន្តលើកឡើងថា៖សម្តេចរំពឹងថា ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នឹងជួយជំរុញស្ត្រីឱ្យបានចូលរួមប្រឡូកក្នុងវិស័យបច្ចេកវិទ្យានិងឌីជីថលដើម្បីរួមដៃជាមួយបុរសក៏ដូចជាគ្រប់ស្រទាប់ប្រជាជនទាំងអស់។

សម្តេចមហារដ្ឋសភាធិការធិបតី សង្ឃឹមថា៖« ក្នុងយុគសម័យនេះ ស្ត្រីនឹងខិតកាន់តែជិតជាមួយបច្ចេកវិទ្យាថ្មី និងឌីជីថល។ វិស័យនេះជាមូលដ្ឋានដ៏សំខាន់ក្នុងការអភិវឌ្ឍ E- Citizen , E-Government ,E-Parliament ,E-Society ,»។

សម្តេចមហារដ្ឋសភាធិការធិបតី ឃួន សុដារី បានមានប្រសាសន៍ផងដែរថា យោងតាមការសិក្សាស្រាវជ្រាវមួយ បង្ហាញថាស្ត្រី ឆាប់ចាប់បានបច្ចេកវិទ្យា និងឌីជីថល ជាងបុរស។

គួរជម្រាបថា គណៈកម្មការ សាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា និងព្រឹទ្ធសភា សហការជាមួយក្រសួងឧស្សហកម្ម វិទ្យាសាស្ត្រ បច្ចេកវិទ្យា នវានុវត្តន៍ រៀបចំវេទិកាផ្សព្វផ្សាយ ស្តីពីវឌ្ឍនភាពនៃវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តាមរយៈការអនុវត្តយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដែលបានប្រព្រឹត្តទៅនៅថ្ងៃទី២៥ ខែមីនា ឆ្នាំ២០២៥ នៅវិមានរដ្ឋសភា។

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជាបាន អញ្ជើញជាអធិបតីភាពដ៏ខ្ពង់ខ្ពស់បើកអង្គវេទិកានេះ ជាមួយនឹងវត្តមានចូលរួមពីសមាជិក សមាជិកា រដ្ឋសភា ព្រឹទ្ធសភា ក្រសួងឧស្សហកម្ម វិទ្យាសាស្ត្រ បច្ចេកវិទ្យា នវានុវត្តន៍ តំណាងក្រសួង ស្ថាប័នពាក់ព័ន្ធ សភាពាណិជ្ជកម្ម វិស័យឯកជន វិទ្យាស្ថានសិក្សាស្រាវជ្រាវ សមាគម អង្គការជាតិ និងអន្តរជាតិ ថ្នាក់ដឹកនាំ និងមន្ត្រីរាជការនៃអគ្គលេខាធិការដ្ឋានសភាទាំងពីរ ព្រមទាំងដៃគូពាក់ព័ន្ធមួយចំនួនទៀត។