ប្រធានាធិបតីអ៊ុយក្រែន លោក Volodymyr Zelenskiy បាននិយាយថា បទឈប់បាញ់ជាមួយរុស្ស៊ី ដែលគ្របដណ្តប់លើការវាយប្រហារសមុទ្រខ្មៅ និងបណ្ដាញថាមពល មានចូលជាធរមានភ្លាមៗកាលពីថ្ងៃអង្គារ (២៥ មីនា) ប៉ុន្តែព្រមានថា ទីក្រុងមូស្គូ កំពុងរៀបចំចាត់ចែង និងបោកបញ្ឆោតលើកិច្ចព្រមព្រៀងនេះរួចទៅហើយ។

លោក Zelenskiy បន្តថា លោកនឹងស្នើឱ្យលោកប្រធានាធិបតីអាមេរិក Donald Trump ផ្គត់ផ្គង់សព្វាវុធ និងដាក់ទណ្ឌកម្មរុស្ស៊ី ប្រសិនបើទីក្រុងមូស្គូ បំពានកិច្ចព្រមព្រៀង។ សហរដ្ឋអាមេរិក បាននិយាយនៅមុននោះថា ខ្លួនបានធ្វើកិច្ចព្រមព្រៀងដាច់ដោយឡែកជាមួយទីក្រុងគីវ និងទីក្រុងមូស្គូ ដើម្បីធានាការធ្វើនាវាចរណ៍ប្រកបដោយសុវត្ថិភាពនៅសមុទ្រខ្មៅ និងដើម្បីអនុវត្តបម្រាមការវាយប្រហារទីតាំងថាមពលក្នុងប្រទេសទាំងពីរ។

លោក Zelenskiy បានប្រាប់សន្និសីទសារព័ត៌មានក្នុងទីក្រុងគីវថា "ទីក្រុងវ៉ាស៊ីនតោន ចាត់ទុកថាកិច្ចព្រមព្រៀងបានចូលជាធរមាន បន្ទាប់ពីការប្រកាសដោយភាគីអាមេរិក" ដោយបន្ថែមថា លោកមិនជឿទុកចិត្តលើរុស្ស៊ី ក្នុងការគោរពចំពោះការរៀបចំនេះទេ។ ក្រោយមក មេដឹកនាំអ៊ុយក្រែនរូបនេះបាននិយាយក្នុងសុន្ទរកថាវីដេអូពេលយប់របស់ខ្លួនថា រុស្ស៊ីកំពុងបញ្ឆោតពិភពលោករួចទៅហើយ។

លោក Zelenskiy លើកឡើងថា វិមានក្រឹមឡាំងបានកុហក នៅពេលខ្លួននិយាយថា កិច្ចព្រមព្រៀងលើការដឹកជញ្ជូនសមុទ្រខ្មៅ ត្រូវបានផ្សារភ្ជាប់ទៅនឹងការដាក់ទណ្ឌកម្មលើទីក្រុងមូស្គូ។ លោកសង្កត់ធ្ងន់ថា អ៊ុយក្រែននឹងធ្វើគ្រប់យ៉ាងដើម្បីអនុវត្តកិច្ចព្រមព្រៀង ប៉ុន្តែរុស្ស៊ី ត្រូវតែដឹងថានឹងមាន "ការឆ្លើយតបដ៏ខ្លាំងក្លា" ប្រសិនបើខ្លួនបានបើកការវាយប្រហារ៕