មនុស្សរាប់រយនាក់បានចូលរួមក្នុងការតវ៉ាប្រឆាំងក្រុមហាម៉ាសដ៏ធំបំផុតនៅហ្កាហ្សាចាប់តាំងពីសង្គ្រាមជាមួយអ៊ីស្រាអែលបានចាប់ផ្តើមផ្ទុះឡើង ដោយបានទាមទារឱ្យក្រុមនេះចុះចេញពីអំណាច។ក្រុមសកម្មប្រយុទ្ធហាម៉ាសរុំមុខ ដែលខ្លះប្រដាប់ដោយកាំភ្លើង និងខ្លះទៀតកាន់ដំបង បានធ្វើអន្តរាគមន៍ និងបង្ខំឱ្យក្រុមបាតុករបំបែកជួរ ដោយវាយដំពួកគេជាច្រើននាក់។

វីដេអូដែលត្រូវបានចែករំលែកព្រោងព្រៀតនៅលើប្រព័ន្ធផ្សព្វផ្សាយសង្គមដោយក្រុមសកម្មជនជាធម្មតារិះគន់ក្រុមហាម៉ាស បានបង្ហាញហ្វូងបុរសវ័យក្មេងដើរតាមដងផ្លូវនៃទីក្រុង Beit Lahia ភាគខាងជើង ដែនដីហ្កាហ្សា កាលពីថ្ងៃអង្គារដោយស្រែកថា ចុះចេញ ក្រុមហាម៉ាសចុះចេញទៅ។

អ្នកគាំទ្រក្រុមហាម៉ាសបានការពារក្រុមនេះ ដោយបាននិយាយសម្រាលពីសារៈសំខាន់នៃបាតុកម្ម និងចោទប្រកាន់ក្រុមអ្នកចូលរួមថាជាជនក្បត់។ ក្រុមហាម៉ាស ពុំទាន់ធ្វើអត្ថាធិប្បាយនៅឡើយទេ។

ការតវ៉ានានានៅភាគខាងជើងទឹកដីហ្កាហ្សា បានកើតឡើងមួយថ្ងៃបន្ទាប់ពីក្រុមខ្មាន់កាំភ្លើងក្រុមជីហាតអ៊ីស្លាមបានបាញ់រ៉ូកែតទៅកាន់ប្រទេសអ៊ីស្រាអែល ដែលជំរុញឱ្យមានការសម្រេចចិត្តរបស់អ៊ីស្រាអែលក្នុងការជម្លៀសប្រជាពលរដ្ឋផ្នែកធំៗនៃតំបន់ Beit Lahia របស់ដែនដីហ្កាហ្សា ដែលបង្កឱ្យមានកំហឹងជាសាធារណៈនៅក្នុងតំបន់នេះ។

អ៊ីស្រាអែលបានបន្តយុទ្ធនាការយោធារបស់ខ្លួននៅតំបន់ហ្កាហ្សា បន្ទាប់ពីបទឈប់បាញ់ជិតពីរខែ ដោយបានស្តីបន្ទោសក្រុមហាម៉ាសចំពោះការបដិសេធសំណើថ្មីរបស់សហរដ្ឋអាមេរិកដើម្បីបន្តបទឈប់បាញ់។ ផ្ទុយទៅវិញ ក្រុមហាម៉ាសបានចោទប្រកាន់អ៊ីស្រាអែលថាបានបោះបង់ចោលកិច្ចព្រមព្រៀងដើម ដែលបានព្រមព្រៀងគ្នាកាលពីខែមករា។មនុស្សចំនួន៧៣០នាក់ បានស្លាប់ក្នុងការវាយប្រហារតាមអាកាសរបស់អ៊ីស្រាអែលកាលពីថ្ងៃ១៨មីនា និងបង្ខំឲ្យពលរដ្ឋប៉ាឡេស្ទីនរាប់ពាន់នាក់ជម្លៀសចេញពីជម្រក ហើយនៅថ្ងៃអង្គាសប្ដាហ៍នេះ អ៊ីស្រាអែលបានបន្តប្រតិបត្តិការយោធាទាំងតាមអាកាសនិងថ្មើរជើង សម្លាប់មនុស្សជិត១០០នាក់ទៀត៕