នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ (Paetongtarn Shinawatra) បានរួចខ្លួនពីការបោះឆ្នោតដកសេចក្ដីទុកចិត្តនៅក្នុងសភានាថ្ងៃពុធ (២៦ មីនា) នេះ នៅក្នុងការសាកល្បងដំបូងនៃតំណែងនាយករដ្ឋមន្ត្រីរបស់លោកស្រី ជុំវិញភាពមិនច្បាស់លាស់នានាដើម្បីបញ្ជាក់ឡើងវិញនូវស្ថិរភាពនៃក្រុមចម្រុះរបស់ខ្លួន។

នាយករដ្ឋមន្ត្រីវ័យក្មេងបំផុតរបស់ថៃរូបនេះ បានឈ្នះការគាំទ្រពីសមាជិកសភាចំនួន ៣១៩រូបក្នុងចំណោម ៤៨៨រូប ដែលមានវត្តមាន ទោះបីជាមានការរារាំងយ៉ាងតឹងរ៉ឹងក្នុងអំឡុងពេលការជជែកដេញដោលក៏ដោយ ដែលចោទលោកស្រីថាមិនមានលក្ខណៈសម្បត្តិគ្រប់គ្រាន់ ខ្វះចំណេះដឹងផ្នែកសេដ្ឋកិច្ច រួមទាំងឥទ្ធិពលនយោបាយពីគ្រួសារ និងបញ្ហាផ្សេងទៀត ខណៈលោកស្រីបានច្រានចោលការចោទប្រកាន់ទាំងអស់នោះ។

ថ្វីបើអត្រាគាំទ្រមិនសូវកក់ក្តៅនៅក្នុងការស្ទង់មតិ និងកំណើនសេដ្ឋកិច្ចមិនសូវខ្លាំងក្លាដូចមិត្តក្នុងតំបន់ក៏ដោយ ក៏លទ្ធផលការបោះឆ្នោតថ្ងៃពុធនេះបានបង្ហាញថា សម្ព័ន្ធចម្រុះទាំង១១ របស់លោកស្រី Paetongtarn នៅតែរឹងមាំ ដោយបន្ទាបការរំពឹងទុកនៃអស្ថិរភាពនៅក្នុងប្រទេសនេះអស់ពេលពីរទសវត្សរ៍ ដែលពោរពេញទៅដោយភាពចលាចលនយោបាយមិនឈប់ឈរ។

លោកស្រី Paetongtarn វ័យ ៣៨ឆ្នាំ បានបង្ហោះសារលើប្រព័ន្ធផ្សព្វផ្សាយសង្គម X ថ្លែងអំណរគុណចំពោះក្រុមចម្រុះដែលកំពុងកាន់អំណាចរបស់លោកស្រីសម្រាប់ការគាំទ្រ ដោយនិយាយថា "រាល់សន្លឹកឆ្នោត - ទាំងការគាំទ្រ និងប្រឆាំង - នឹងក្លាយជាកម្លាំងចិត្តសម្រាប់លោកស្រី និងគណៈរដ្ឋមន្ត្រី ដើម្បីបន្តការងារសម្រាប់ប្រជាជន"៕