ភ្នំពេញ៖ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានឱ្យដឹងថា មានប្រជាពលរដ្ឋដល់ទៅជាង ៤៤ម៉ឺននាក់ហើយ ត្រូវបានចុះឈ្មោះបោះឆ្នោតថ្មីនៅក្នុងរយៈពេល ៤៦ថ្ងៃកន្លងមកនេះ។
គ.ជ.ប.បានប្រកាសឱ្យដឹងបែបនេះនៅក្នុងសេចក្ដីប្រកាសព័ត៌មានប្រចាំថ្ងៃរបស់ខ្លួនអំពីលទ្ធផលបណ្ដោះអាសន្ននៃការពិនិត្យបញ្ជីឈ្មោះ និងចុះឈ្មោះបោះឆ្នោតសម្រាប់ឆ្នាំ២០២១នេះ។
ក្នុងសេចក្ដីប្រកាសព័ត៌មាននោះ គ.ជ.ប. បញ្ជាក់ថា ប្រជាពលរដ្ឋចំនួន ៤៤២,៤៤០នាក់ ត្រូវបានចុះឈ្មោះថ្មីក្នុងបញ្ជីបោះឆ្នោតដែលធ្វើឡើងនៅចន្លោះថ្ងៃទី១២ ខែតុលា រហូតមកដល់ថ្ងៃម្សិលមិញនេះ។
គ.ជ.ប. បានឱ្យដឹងទៀតថា ក្នុងរយៈពេល ៤៦ថ្ងៃមកនេះ ខ្លួនក៏បានលុបឈ្មោះប្រជាពលរដ្ឋចំនួន ២១៥,២៧៥នាក់ ចេញពីបញ្ជីឈ្មោះបោះឆ្នោតផងដែរ ខណៈប្រជាពលរដ្ឋ ១៨៤,០៨១នាក់ទៀត ត្រូវបានកែតម្រូវទិន្នន័យរបស់ពួកគេ។
ចំណែកឯពលរដ្ឋចំនួន ១៤៤,១២៦នាក់ទៀត គ.ជ.ប. បញ្ជាក់ថា ត្រូវបានផ្ទេរឈ្មោះចូលទៅទីតាំងឃុំ ឬសង្កាត់ថ្មីរបស់ពួកគេហើយ។
គ.ជ.ប. បានដំណើរការពិនិត្យឈ្មោះ និងចុះឈ្មោះបោះឆ្នោតថ្មីចាប់តាំងពីថ្ងៃទី១២ ខែតុលា សម្រាប់រយៈពេល ៥០ថ្ងៃ ពោលគឺនៅសល់ត្រឹមតែ ៤ថ្ងៃទៀតប៉ុណ្ណោះ ដំណើរការនេះ នឹងត្រូវបិទបញ្ចប់៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
