នៅក្នុងសេចក្តីថ្លែងការណ៍មួយ កាលពីថ្ងៃអង្គារ (ទី២៥ ខែមីនា) អាជ្ញាធរសុខាភិបាលដែលមានមូលដ្ឋាន នៅតំបន់ហ្កាហ្សា បានឲ្យដឹងថា យ៉ាងណាស់មនុស្សចំនួន ៧៩២នាក់ ត្រូវបានសម្លាប់ និង ១.៦៦៣នាក់ផ្សេងទៀត បានរងរបួសនៅក្នុងតំបន់ហ្កាហ្សាស្ទ្រីប ចាប់តាំងពីយោធាអ៊ីស្រាអែល បានចាប់ផ្ដើមការវាយប្រហារតាមផ្លូវអាកាសដ៏ខ្លាំងក្លាឡើងវិញ នៅទូទាំងដែនដីនេះ ចាប់ពីថ្ងៃទី១៨ ខែមីនា បន្ទាប់ពីមានបទឈប់បាញ់រយៈពេល ២ខែ។

សេចក្តីថ្លែងការណ៍ បានឲ្យដឹងថា ក្នុងរយៈពេល ២៤ម៉ោងកន្លងមកនេះ មនុស្ស ៦២នាក់ បានបាត់បង់ជីវិត និងអ្នករងរបួស ២៩៦នាក់ ត្រូវបានបញ្ជូនទៅមន្ទីរពេទ្យ នៅទូទាំងតំបន់ហ្កាហ្សា ដោយនាំឲ្យចំនួនអ្នកស្លាប់សរុបកើនឡើងដល់ ៥០.១៤៤នាក់ និង ១១៣.៧០៤នាក់ បានរងរបួស គិតចាប់តាំងពីការប្រយុទ្ធគ្នា បានផ្ទុះឡើងកាលពីដើមខែតុលា ឆ្នាំ២០២៣។

កាលពីថ្ងៃអង្គារនោះដែរ កងកម្លាំងការពារអ៊ីស្រាអែល (IDF) បានចេញសេចក្តីថ្លែងការណ៍មួយ ដោយប្រាប់ថា ចាប់តាំងពីកងទ័ពអ៊ីស្រាអែល ចាប់ផ្តើមប្រតិបត្តិការយោធាឡើងវិញ នៅតំបន់ហ្កាហ្សា នៅដើមខែនេះ វាត្រូវបានគេប៉ាន់ប្រមាណថា សមាជិកក្រុមហាម៉ាស និងក្រុមប្រដាប់អាវុធប៉ាឡេស្ទីនជាង ១៥០នាក់ ត្រូវបានសម្លាប់។

សេចក្តីថ្លែងការណ៍ បានបន្ថែមថា នាពេលបច្ចុប្បន្ននេះ កងកម្លាំងជើងគោករបស់អ៊ីស្រាអែល កំពុងធ្វើប្រតិបត្តិការនៅក្នុងទីតាំងជាច្រើនទូទាំងតំបន់ហ្កាហ្សា។ កងទ័ពអ៊ីស្រាអែលបានរុលទៅច្រករបៀង Netzarim នៅភាគកណ្តាលតំបន់ហ្កាហ្សាស្ទ្រីប ហើយបានកាន់កាប់ប្រហែលពាក់កណ្តាលនៃច្រករបៀងនេះ។

នៅថ្ងៃដដែលនោះ រដ្ឋមន្ត្រីការពារជាតិអ៊ីស្រាអែល លោក Israel Katz បានលើកឡើងនៅក្នុងសេចក្តីថ្លែងការណ៍មួយថា លោកបានអនុម័តផែនការប្រតិបត្តិការរបស់ IDF លើផ្នែកជាក់លាក់របស់តំបន់ហ្កាហ្សា ដើម្បីបន្តប្រតិបត្តិការយោធា នៅតំបន់នេះ។ អមដោយកត់សម្គាល់ថា គោលដៅចម្បងរបស់អ៊ីស្រាអែល នាពេលនេះ គឺការនាំយកចំណាប់ថ្នូរទាំងអស់ត្រលប់ទៅផ្ទះសម្បែងរបស់ពួកគេវិញនោះ លោកបានព្រមានថា ប្រសិនបើក្រុមហាម៉ាសមិនដោះលែងចំណាប់ថ្នូរដែលនៅសល់ទេនោះ ក្រុមនេះនឹងទទួល «ផលវិបាកយ៉ាងធ្ងន់ធ្ងរ»៕