ការស្ទង់មតិពីស្ថាប័នស្ទង់មតិលម្អៀងទៅនិន្នាការអភិរក្សនិយម បានបង្ហាញថា ចំនួនប្រជាជនអាមេរិក ដែលគិតថា សហរដ្ឋអាមេរិកកំពុងឆ្ពោះទៅរកទិសដៅខុស បានកើនឡើងតិចតួចក្នុងប៉ុន្មានសប្តាហ៍ថ្មីៗនេះ។ 

ពាក់ព័ន្ធនឹងលទ្ធផលនៃការស្ទង់មតិនេះ សារព័ត៌មាន Newsweek បានទាក់ទងទៅកាន់សេតវិមានតាមរយៈអ៊ីម៉ែល ដើម្បីសុំការអត្ថាធិប្បាយ។

ការស្ទង់មតិអំពីស្ថានភាពប្រទេស គឺជាសូចនាករដ៏ល្អមួយ ដែលចង្អុលបង្ហាញពីកម្លាំងនយោបាយរបស់លោកប្រធានាធិបតី Donald Trump និងវិសាលភាពដែលលោកបន្តការគាំទ្រ ចំពោះអ្នកបោះឆ្នោត។ ខណៈពេលដែលតំណែងប្រធានាធិបតីរបស់លោក ស្ថិតក្នុងដំណាក់កាលចាប់ផ្ដើម ការនិយាយរឿងរ៉ាវអំពីអនាគតរបស់សហរដ្ឋអាមេរិក នឹងបង្ហាញនូវសារៈសំខាន់ នៅពេលដែលអាមេរិកសំដៅឆ្ពោះទៅរកវដ្តនៃការបោះឆ្នោតពាក់កណ្តាលអាណត្តិ នៅឆ្នាំ២០២៦។

យោងតាមការស្ទង់មតិរបស់ស្ថាប័ន Rasmussen Reports លើអ្នកបោះឆ្នោតអាមេរិកចំនួន ១.៩៦៥នាក់ បានបង្ហាញថា ៥០ភាគរយ គិតថា ប្រទេសនេះកំពុងស្ថិតនៅលើផ្លូវខុស។ ការស្ទង់មតិដែលបានធ្វើឡើង ចាប់ពីថ្ងៃទី១៦ ដល់ថ្ងៃទី២០ ខែមីនា មានកម្រិតល្អៀងគ្នាក្នុងរង្វង់ ២ភាគរយ។

តែការស្ទង់មតិ ក៏បានរកឃើញផងដែរថា ៤៥ភាគរយ បានលើកឡើងថា សហរដ្ឋអាមេរិកកំពុងធ្វើដំណើរទៅរកទិសដៅត្រឹមត្រូវ។ ទន្ទឹមនឹងនេះដែរ នៅថ្ងៃទី១៤ ខែកុម្ភៈ ឆ្នាំ២០២៥ ស្ថាប័ន Rasmussen បានរកឃើញថា ជនជាតិអាមេរិកភាគច្រើន ដែលជាលើកដំបូង ក្នុងរយៈពេល ២០ឆ្នាំនៃការបោះឆ្នោត ជឿថា ប្រទេសនេះកំពុងដើរលើផ្លូវត្រូវ។

ការស្ទង់មតិនាពេលថ្មីៗនេះ បានបង្ហាញថា ការមិនពេញចិត្ត នឹងការដោះស្រាយផ្នែកសេដ្ឋកិច្ចរបស់លោក Trump គឺជាកត្តាសំខាន់ ដែលនាំឲ្យលោកធ្លាក់ចុះប្រជាប្រិយភាព។ ការស្ទង់មតិចុងក្រោយដែលធ្វើឡើងដោយប្រព័ន្ធផ្សព្វផ្សាយ NBC News បានរកឃើញថា ជាងពាក់កណ្តាល (៥៤ភាគរយ) បាននិយាយថា ពួកគេមិនពេញចិត្តចំពោះរបៀបដែល Trump កំពុងគ្រប់គ្រងសេដ្ឋកិច្ច បើធៀបនឹង ៤៤ភាគរយដែលគាំទ្រ៕