កងទ័ពធម្មតារបស់ប្រទេសស៊ូដង់កាលពីថ្ងៃអង្គារ បានបដិសេធថា មិនបានកំណត់គោលដៅលើជនស៊ីវិលទេ បន្ទាប់ពីមនុស្សយ៉ាងតិច ២៧០នាក់ បានស្លាប់ នៅក្នុងការវាយប្រហារតាមអាកាសលើទីផ្សារមួយ ក្នុងទីក្រុង Tora នៃNorth Darfur។

អ្នកនាំពាក្យយោធាលោក Nabil Abdallah បាននិយាយថា៖«ការអះអាងមិនពិតបែបនេះ កើតឡើងនៅពេលណាដែលកងកម្លាំងរបស់យើងអនុវត្តរដ្ឋធម្មនុញ្ញ និងសិទ្ធិស្របច្បាប់របស់ពួកគេ ក្នុងការបញ្ចប់ គោលដៅអរិភាព»។ «យើងបានធ្វើការវាយប្រហារផ្លូវអាកាសរបស់យើង តាមច្បាប់កំណត់គោលដៅ ស្របតាមច្បាប់អន្តរជាតិ ហើយយើងមិនអាចកំណត់គោលដៅជនស៊ីវិលស្លូតត្រង់បានឡើយ»។

កងទ័ពបានប្រយុទ្ធប្រឆាំងនឹងកងកម្លាំងយោធាប៉ារ៉ាគាំទ្ររហ័ស((RSF))ដែលជាគូប្រជែង តាំងពីខែមេសា ឆ្នាំ២០២៣ ហើយភាគីទាំងពីរ ត្រូវបានចោទប្រកាន់ពីបទឧក្រិដ្ឋកម្មសង្គ្រាម។ ជម្លោះនេះ បានសម្លាប់មនុស្សយ៉ាងហោចណាស់ ១៥០.000នាក់ និងប្រហែល ១២លាននាក់ បានរត់ភៀសខ្លួន។

ការវាយប្រហារនៅក្នុងតំបន់ Darfur បានកើតឡើង ប៉ុន្មានថ្ងៃបន្ទាប់ពីកងទ័ព បានដណ្តើមយកវិមានប្រធានាធិបតី នៅទីក្រុងខាទុំ ( Khartoum) មកវិញ ក្នុងជ័យជម្នះដ៏សំខាន់មួយលើក្រុមទាហានប៉ារ៉ា។ ទីក្រុងEl-Fasherនៃរដ្ឋ North Darfur មានចម្ងាយ ៤០គីឡូម៉ែត្រភាគខាងត្បូងនៃទីក្រុងTora គឺជារដ្ឋធានីរដ្ឋ ក្នុងតំបន់តែមួយគត់ ដែលកងកម្លាំងយោធាប៉ារ៉ាគាំទ្ររហ័ស (RSF) មិនបានកាន់កាប់។