នៅថ្ងៃពុធនេះ ជនប៉ាឡេស្ទីនរាប់រយនាក់ នាំគ្នាតវ៉ានៅតំបន់ភាគខាងជើងហ្កាហ្សាស្រ្ទីប ដើម្បីទាមទារឲ្យបញ្ចប់សង្រ្គាម និងស្រែកហៅឲ្យក្រុមហាម៉ាសចេញក្រៅ នៅក្នុងការបង្ហាញការជំទាស់ជាសាធារណៈដ៏កម្រមួយចំពោះក្រុមជីវពលមួយនេះដែលបានបង្កឲ្យមានសង្រ្គាចុងក្រោយ ជាមួយនឹងការវាយឆ្មក់របស់ពួកគេកាលពីថ្ងៃទី ៧ ខែតុលា ឆ្នាំ ២០២៣លើតំបន់ភាគខាងត្បូងអ៊ីស្រាអែល ។

តំបន់ភាគខាងជើងហ្កាហ្សា ស្ថិតក្នុងចំណោមតំបន់រងការខ្ទេចខ្ទាំខ្លាំងបំផុតនៅក្នុងតំបន់ហ្កាហ្សា ។ អគារភាគច្រើននៅតំបន់មានមនុស្សរស់នៅច្រើន បានក្លាយជាគំនរបាក់បែក ហើយភាគច្រើននៃពលរដ្ឋ បានជម្លៀសខ្លួនច្រើនលើកច្រើនសារ ដើម្បីគេចចេញពីជម្លោះមួយនេះ ។

មនុស្សរាប់ម៉ឺននាក់ ដែលបានជម្លៀសខ្លួនចេញទៅកាន់តំបន់ភាគខាងត្បូងហ្កាហ្សានៅពេលសង្រ្គាមចាប់ផ្តើមភ្លាមៗដែលបច្ចុប្បន្នបានសម្លាប់ជនប៉ាឡេស្ទីនជិត ៥ម៉ឺននាក់នោះ បានវិលត្រឡប់ទៅកាន់ផ្ទះរងការបំផ្លិចបំផ្លាញរបស់ពួកគេវិញ នៅតំបន់ភាគខាងជើង ពេលដែលបទឈប់បាញ់ចូលជាធរមានកាលពីខែមករា ។

បច្ចុប្បន្ន ការបញ្ជាឲ្យជម្លៀសខ្លួនរបស់អ៊ីស្រាអែល ក្រោយពួកគេបើកការវាយប្រហារឡើងវិញកាលពីថ្ងៃទី ១៨ ខែមីនាកន្លងទៅ បានធ្វើឲ្យរង្គោះរង្គើរដល់បទឈប់បាញ់រយៈពេល ២ខែ អំឡុងពេលដែលក្រុមហាម៉ាស់ បានប្រគល់ចំណាប់ថ្នូរបន្ថែមទៀតដល់អ៊ីស្រាអែល ។

ចាប់តាំងពីអ៊ីស្រាអែលចាប់ផ្តើមការវាយប្រហារតំបន់ហ្កាហ្សាឡើងវិញពេលដែលពួកគេនិយាយថា គោលដៅសំខាន់គឺត្រូវកម្ទេចចោលឲ្យអស់ក្រុមហាម៉ាស់នោះ បានសម្លាប់មនុស្សជិត ៧០០នាក់ ដែលភាគច្រើននៃពួកគេគឺជាស្រ្តី និងកុមារ ៕