អាមេរិក៖ ​ប្រធានាធិបតី​សហរដ្ឋអាមេរិក​លោក Joe Biden បាន​ជំរុញ​ប្រជាជន​អាមេរិក​កាន់​តែ​ច្រើន​ឱ្យ​ចាក់​វ៉ា​ក់សាំង​បង្ការ រួម​ទាំង​ការ​ចាក់វ៉ាក់សាំង​ដូ​ស​ជំរុញ ខណៈ​ដែល​លោក​បាន​ស្វែងរក​វិធី​ដើម្បី​បំបាត់​ក្តីបារម្ភជុំវិញ​វីរុស​ប​ម្លែ​ង​ខ្លួន​ថ្មី Omicron​។ លោកប្រធានាធិបតី​បាន​ចាត់ទុក​វីរុស​ប​ម្លែ​ង​ខ្លួន​ថ្មី​នេះ​ថា​ ជា​បុព្វហេតុ​សម្រាប់​ការ​ព្រួយ​បារម្ភ ប៉ុន្តែ​មិន​មែន​ជា​មូលហេតុ​សម្រាប់​ការ​ភ័យ​ស្លន់ស្លោ​នោះ​ទេ​។

​លោក Biden បាន​និយាយ​ថា មិន​យូរ​មិន​ឆាប់​នោះ​ទេ យើងនឹង​ឃើញ​មាន​ករណី​វីរុសប​ម្លែ​ង​ខ្លួន​ថ្មី​នេះ​នៅ​ទី​នេះ​ ក្នុង​សហរដ្ឋអាមេរិក​។ យើង​នឹង​ត្រូវ​ប្រឈមមុខ​ទៅ​នឹង​ការ​គំរាម​កំហែង​ថ្មី​នេះ ដូចដែល​យើង​បាន​ប្រឈមមុខ​នឹង​ការ​គំរាម​កំហែង​ ដែល​បាន​កើតឡើង​មុន​ៗ​។ វីរុស​ប​ម្លែ​ង​ខ្លួន​ថ្មី​នេះ​បាន​បង្ហាញ​ការសាកល្បង​ថ្មី ចំពោះ​កិច្ច​ខិត​ខំ​ប្រឹងប្រែង​រប​ស់​លោក Biden ដើម្បីទប់ស្កាត់​ជំងឺ​រាតត្បាត កាត់បន្ថយ​ផលប៉ះពាល់​របស់​វា​ទៅលើ​សេដ្ឋកិច្ច និង​ផ្ដល់​ភាព​ប្រក្រតីឡើងវិញ​ដល់​សហរដ្ឋអាមេរិកក្នុង​រដូវ​វិស្សមកាល​។​

​លោក Biden បាន​និយាយ​កាលពី​ថ្ងៃ​ចន្ទ​អំពី​ភាព​បន្ទាន់ ​នៃ​ការ​ចាក់​វ៉ាក់សាំង​បង្ការ​វីរុស COVID-19 ដើម្បី​ការពារ​វីរុស​ប្រភេទ​ផ្សេងៗ​ជាពិសេស ខណៈ​ប្រជាជន​អាមេរិក​ប្រមាណ 80លាន​នាក់ដែល​មាន​អាយុ​ចាប់ពី​ 5​ឆ្នាំ​ឡើង​ទៅ​នៅ​មិន​ទាន់​បាន​ចាក់​វ៉ាក់សាំង​នៅឡើយ​។ លោក ​Biden មិនបានប្រកាស​ពី​ការ​រឹត​បន្តឹង​ទាក់ទង​ទៅ​នឹង​វីរុស​ប​ម្លែ​ង​ខ្លួន​ថ្មី​នោះ​ទេ ប៉ុន្តែ​មាន​វិធានការ​កាលពី​សប្ដាហ៍​មុន ដើម្បី​រឹត​បន្តឹងការ​ធ្វើ​ដំណើរ​មក​ពី​អាហ្វ្រិក​ខាងត្បូង និង​ប្រទេស​ចំនួន ៧​ ផ្សេងទៀត​នៅ​ក្នុង​តំបន់នោះដែល​បាន​ចូល​ជា​ធរមាន​កាលពី​ថ្ងៃ​ចន្ទ​៕

អត្ថបទ៖ ប៊ុនថន