ក្រុមមួកសដែលជាក្រុមការពារស៊ីវិលស៊ីរី បានជម្លៀសមនុស្សជាច្រើនគ្រួសារចេញពីភូមិ Kuwayya ស្ថិតក្នុងខេត្ត Daraa នៅភាគខាងត្បូងប្រទេសស៊ីរី ក្រោយការវាយប្រហាររបស់អ៊ីស្រាអេល បានសម្លាប់មនុស្ស ៦នាក់ ។

នៅក្នុងសេចក្តីថ្លែងការណ៍មួយ ក្រសួងការបរទេសស៊ីរី បានថ្កោលទោសចំពោះការបន្តការឈ្លានពានរបស់អ៊ីស្រាអែល លើទឹកដីស៊ីរីដែលបានឃើញការកើនឡើងភាពតានតឹងដ៏គ្រោះថ្នាក់ នៅក្នុងខេត្ត Daraa ។ 

គួរឲ្យដឹងថា អ៊ីស្រាអែលបានបន្តយុទ្ធនាការវាយប្រហាររបស់ខ្លួន នៅក្នុងប្រទេសស៊ីរី បន្ទាប់ពីការទម្លាក់លោក Bashar al-Assad ចេញពីអំណាច ពេលដែលការគ្រប់គ្រងរបស់លោកត្រូវបានបញ្ចប់ កាលពីឆ្នាំមុន ក្រោយពីការវាយប្រហារទៅមុខយ៉ាងឆាប់រហ័សរបស់ក្រុមឧទ្ទាម ធ្វើឲ្យរូបលោកភៀសខ្លួន ទៅកាន់ប្រទេសរុស្ស៊ី ។

ខណៈពេលនោះដែរ ប្រទេសអារ៉ាប៊ីសាអ៊ូឌីត បានថ្កោលទោសផងដែរចំពោះការវាយប្រហាររបស់អ៊ីស្រាអែលទៅលើប្រទេសស៊ីរីដែលបានសម្លាប់ជនស៊ីវិលយ៉ាងច្រើន ។ 

សេចក្តីថ្លែងការណ៍របស់ក្រសួងការបរទេសអារ៉ាប៊ីសាអ៊ូឌីត បានលើកឡើងថា ព្រះរាជាណាចក្រនេះ បញ្ជាក់ជាថ្មីនូវការបដិសេធយ៉ាងដាច់អហង្ការចំពោះការព្យាយាមបន្តរបស់អាជ្ញាធរកាន់កាប់អ៊ីស្រាអែល ក្នុងការធ្វើឲ្យប៉ះពាល់ដល់សន្តិសុខ និងស្ថិរភាពរបស់ប្រទេសស៊ីរី និងក្នុងតំបន់ តាមរយៈការរំលោភបំពានច្បាប់អន្តរជាតិម្តងហើយម្តងទៀត ៕