បេសកកម្មសន្តិសុខពហុជាតិដែលគាំទ្រដោយអង្គការសហប្រជាជាតិ បាននិយាយនៅថ្ងៃពុធនេះថា នគរបាលកេនយ៉ាម្នាក់ ដែលដាក់ពង្រាយនៅប្រទេសហៃទី បានបាត់ខ្លួនបន្ទាប់ពីក្រុមជនអន្ធពាលដ៏ឃោរឃៅ បានវាយប្រហារមន្ត្រីមួយក្រុង ក្នុងបេសកកម្មជួយសង្គ្រោះ។

សេចក្តីថ្លែងការណ៍របស់បេសកកម្ម បានឲ្យដឹងថា មន្ត្រីកេនយ៉ាកាលពីថ្ងៃអង្គារ កំពុងធ្វើដំណើរ ដើម្បីជួយសង្គ្រោះនគរបាលហៃទីដែលជាប់គាំងក្នុងប្រឡាយមួយ «ដែលគេសង្ស័យថា ត្រូវបានជីកដោយចេតនាដោយក្រុមជនអន្ធពាល ដោយបន្ថែមថា «ក្រុមពិសេសត្រូវបានដាក់ពង្រាយ» ដើម្បីស្វែងរកមន្រ្តីដែលបាត់ខ្លួន។

ប្រព័ន្ធផ្សព្វផ្សាយក្នុងស្រុកនៅប្រទេសហៃទី បានរាយការណ៍ថា មន្ត្រីនេះ ត្រូវបានសម្លាប់ ហើយវីដេអូរបស់បុរសដែលស្លាប់ម្នាក់ស្លៀកពាក់ឯកសណ្ឋានកេនយ៉ា ត្រូវបានចែករំលែក នៅលើប្រព័ន្ធផ្សព្វផ្សាយសង្គម។

យោងតាមអង្គការសហប្រជាជាតិ អំពើហិង្សាបង្កឡើងដោយក្រុមជនអន្ធពាល បានធ្វើឲ្យមនុស្សជាងមួយលាននាក់គ្មានផ្ទះសម្បែង នៅក្នុងប្រទេសនៃតំបន់ការ៉ាអ៊ីបនេះ ក្នុងរយៈពេលប៉ុន្មានឆ្នាំថ្មីៗនេះ ជាមួយនឹងមនុស្សជាច្រើនចូលទៅក្នុងជម្រកបណ្តោះអាសន្ន និងគ្មានអនាម័យ បន្ទាប់ពីខ្មាន់កាំភ្លើងបានវាយកម្ទេចផ្ទះរបស់ពួកគេ។

កម្លាំងដឹកនាំដោយប្រទេសកេនយ៉ា ត្រូវបានដាក់ឲ្យដំណើរការកាលពីឆ្នាំមុន និងបានបំពេញភារកិច្ចប្រយុទ្ធជាមួយក្រុមជនអន្ធពាល ដែលកំពុងព្យាយាមដណ្តើមកាន់កាប់ទាំងស្រុងនូវរដ្ឋធានីរបស់ប្រទេសហៃទី។ ប្រទេសកេនយ៉ា បានសន្យាថា នឹងបញ្ជូនមន្ត្រីចំនួន១.000នាក់ ទៅកាន់ប្រទេសហៃទី។ ចាប់តាំងពីខែមិថុនាមក មន្ត្រីចំនួន ៨០០នាក់ ត្រូវបានដាក់ពង្រាយ។