នាយកប្រតិបត្តិរបស់ក្រុមហ៊ុន Apple លោក Tim Cook នៅថ្ងៃពុធ (ទី២៦ ខែមីនា) បានពោលសរសើរ «អ្នកអភិវឌ្ឍន៍ជំនាន់ក្រោយ» ក្នុងអំឡុងពេលមានដំណើរទស្សនកិច្ចទៅកាន់មជ្ឈមណ្ឌលបច្ចេកវិទ្យាមួយ នៅភាគខាងកើតប្រទេសចិន ខណៈដែលក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកមួយនេះ កំពុងប្រឹងប្រែងបន្តរក្សាភាពសំខាន់របស់ខ្លួន នៅក្នុងទីផ្សារអ្នកប្រើប្រាស់ដ៏ធំរបស់ប្រទេសនេះ។

ក្រុមហ៊ុនផលិតទូរសព្ទ iPhone មួយនេះ បានបាត់បង់ឋានៈរបស់ខ្លួន ក្នុងនាមជាយីហោស្មាតហ្វូនដែលលក់ដាច់បំផុត នៅប្រទេសចិន ក្នុងឆ្នាំ២០២៤ ប៉ុន្តែបានប្រឹងប្រែងលើកកម្ពស់ទំនាក់ទំនងរបស់ខ្លួនជាមួយប្រទេសនេះ ក្នុងរយៈពេលប៉ុន្មានខែថ្មីៗនេះ។

តាមរយៈការបង្ហោះលើបណ្ដាញសង្គម Weibo របស់ចិន ដោយមានទាំងវីដេអូដែលរូបលោកកំពុងប្រាស្រ័យទាក់ទងជាមួយនិស្សិត លោក Cook បាននិយាយថា៖ «រំភើបណាស់ដែលបានជួបអ្នកអភិវឌ្ឍន៍ជំនាន់ក្រោយ នៅសាកលវិទ្យាល័យ Zhejiang នាថ្ងៃនេះ»។

ការបង្ហោះនេះ បានកើតលេចឡើង នៅពេលដែលក្រុមហ៊ុន Apple បានប្រកាសថា ខ្លួននឹងបរិច្ចាគ ៣០លានយ័ន (៤,១លានដុល្លារ) ដល់មហាវិទ្យាល័យនេះ ក្នុងគោលបំណងផ្តល់ឲ្យនិស្សិតនូវវគ្គបណ្តុះបណ្តាលបច្ចេកទេស និងអាជីវកម្ម ដើម្បីអភិវឌ្ឍកម្មវិធី។

មានមូលដ្ឋាននៅទីក្រុង Hangzhou សាកលវិទ្យាល័យ Zhejiang ត្រូវបានគេស្គាល់ថា ជាទីកន្លែងបង្កើតអ្នកអភិវឌ្ឍន៍ដ៏មានទេពកោសល្យផ្នែកបច្ចេកវិទ្យា ក្នុងនោះរួមទាំងលោក Liang Wenfeng ជាស្ថាបនិកនៃក្រុមហ៊ុន AI (បញ្ញាសិប្បនិម្មិត) គឺ DeepSeek ផងដែរ។

ជាមួយគ្នានេះ លោក Cook បានជួបជាមួយរដ្ឋមន្ត្រីក្រសួងពាណិជ្ជកម្មចិន លោក Wang Wentao នៅខាងក្រៅវេទិកាអភិវឌ្ឍន៍ នៅទីក្រុងប៉េកាំង កាលពីថ្ងៃទី២៤ ខែមីនា ដោយក្រសួងបានឲ្យដឹងថា ពួកលោក «បានផ្លាស់ប្តូរទស្សនៈ ស្តីពីការអភិវឌ្ឍន៍អាជីវកម្មរបស់ក្រុមហ៊ុន Apple នៅប្រទេសចិន ទំនាក់ទំនងសេដ្ឋកិច្ច និងពាណិជ្ជកម្មចិន-អាមេរិក រួមជាមួយប្រធានបទផ្សេងៗទៀត»៕