លោកនាយករដ្ឋមន្រ្តី Ulf Kristersson នៅថ្ងៃពុធ (ទី២៦ ខែមីនា) នេះ បាននិយាយថា ប្រទេសស៊ុយអែតគ្រោងនឹងបង្កើនការចំណាយលើវិស័យការពារជាតិរបស់ខ្លួនឲ្យដល់កម្រិត ៣,៥ភាគរយនៃ GDP (ផលិតផលក្នុងស្រុកសរុប) នៅឆ្នាំ២០៣០ ដែលជាការចាប់ផ្ដើមដ៏ធំ និងលឿនបំផុតជាងការគ្រោងទុកពីមុន ជាផ្នែកនៃការបំពាក់អាវុធឡើងវិញដ៏ធំបំផុតរបស់ប្រទេសនេះ គិតចាប់តាំងពីសម័យសង្រ្គាមត្រជាក់។

រហូតមកដល់ពេលនេះ ការចំណាយលើវិស័យការពារជាតិ ត្រូវបានគេព្យាកថា នឹងឈានដល់កម្រិត ២,៤ភាគរយនៃ GDP ក្នុងឆ្នាំនេះ និង ២.៦ភាគរយ នៅឆ្នាំ២០២៨ ប៉ុន្តែមន្ត្រីរដ្ឋាភិបាលបានទទួលស្គាល់ថា នឹងត្រូវការបន្ថែមទៀត ចំពេលមានការព្រមានរបស់សហរដ្ឋអាមេរិក ដែលថា សន្តិសុខអឺរ៉ុបមិនអាចជាចំណុចផ្ដោតសំខាន់របស់ទីក្រុងវ៉ាស៊ីនតោនទៀតទេ។

លោក Kristersson បានប្រាប់សន្និសីទសារព័ត៌មានមួយថា រដ្ឋាភិបាលជឿជាក់ថា អង្គការណាតូ (NATO) នឹងកំណត់គោលដៅឆាប់ៗនេះ ដើម្បីឲ្យប្រទេសជាសមាជិកចំណាយចន្លោះពី ៣ភាគរយ ទៅ ៤ភារយនៃ GDP ហើយស៊ុយអែតនឹងបំពេញតាមគោលដៅថ្មី ដោយការប៉ាន់ប្រមាណបណ្តោះអាសន្នកំណត់នៅកម្រិត ៣,៥ភាគរយ។

គួរបញ្ជាក់ថា ប្រទេសអឺរ៉ុបខាងជើងដែលមិនមានសង្រ្គាមអស់រយៈពេល ២សតវត្សរ៍មកហើយនោះ បានបង្កើនទ្វេដងនូវថវិការសម្រាប់វិស័យការពារជាតិ ក្នុងរយៈពេល ៤ឆ្នាំចុងក្រោយនេះ ខណៈដែលប្រទេសនេះសម្លឹងដល់ការពង្រឹងផ្នែកយោធាដែលខ្វះខាតការវិនិយោគ បន្ទាប់ពីសហភាពសូវៀតដួលរលំ៕