ក្រុមមន្រ្តីនិយាយនៅថ្ងៃពុធនេះថា ភ្លើងឆេះព្រៃក្នុងចំណោមភ្លើងឆេះព្រៃដ៏អាក្រក់បំផុតពុំធ្លាប់ដែលមាននៅកូរ៉េខាងត្បូង បានសម្លាប់មនុស្សយ៉ាងហោច ២៤នាក់ ក្នុងនោះភ្លើងឆេះព្រៃមួយចំនួនបង្កឲ្យមានការខូចខាតធ្ងន់ធ្ងរបំផុត ហើយនិងគំរាមកំហែងដល់តំបន់ចុះបញ្ជីសម្បត្តិបេតិគភណ្ឌពិភពលោករបស់អង្គការ UNESCO ចំនួន ២កន្លែង ។

ភ្លើងឆេះព្រៃរាប់សិបកន្លែង បានឆាបឆេះឡើងកាលពីចុងសប្តាហ៍កន្លងទៅ បង្ខំឲ្យមនុស្សប្រហែល ២៧.០០០នាក់ ជម្លៀសខ្លួនចេញយ៉ាងបន្ទាន់ ដោយភ្លើងឆេះព្រៃទាំងអស់នេះ បានកាត់ផ្តាច់ផ្លូវ និងធ្វើឲ្យដួលរលំខ្សែទំនាក់ទំនង ខណៈអ្នកស្រុករត់គេចទាំងការស្លន់ស្លោ ។

ចំនួនមនុស្សស្លាប់ បានកើនឡើងដល់ ២៤នាក់នៅថ្ងៃពុធនេះ ពេលដែលអណ្តាតភ្លើងរីករាលដាល់កាន់តែខ្លាំងដោយសារខ្យល់បក់ បានឆាបឆេះតំបន់ជិតខាង និងវិហារបុរាណមួយកន្លែង ។

ក្រសួងមហាផ្ទៃ និងមន្រ្តីសុវត្ថិភាព និយាយប្រាប់ទីភ្នាក់ងារព័ត៌មាន AFPថា មនុស្ស ២៤នាក់ ត្រូវបានគេបញ្ជាក់ថា បានស្លាប់ដោយសារភ្លើងឆេះព្រៃមកទល់នឹងពេលនេះ ក្នុងនោះមនុស្ស ១២នាក់ រងរបួសធ្ងន់ ។

ក្រុមមន្រ្តីនិយាយថា ភាគច្រើននៃអ្នកស្លាប់ គឺជាអ្នកស្រុក ប៉ុន្តែក្រុមភ្នាក់ងារពន្លត់អគ្គិភ័យយ៉ាងហោច ៣នាក់ ត្រូវបានសម្លាប់ផងដែរ ហើយអ្នកបើកបរឧទ្ធម្ភាគចក្រម្នាក់ បានស្លាប់ ពេលដែលឧទ្ធម្ភាគចក្ររបស់លោកបានធ្លាក់នៅតំបន់ភ្នំ ៕