ការវាយប្រហារថ្មីរបស់អ៊ីស្រាអែលលើតំបន់ហ្កាហ្សាស្រ្ទីប បានបន្តឈានចូលដល់ថ្ងៃទី ៩ជាប់ៗគ្នា ដោយបានសម្លាប់ជនប៉ាឡេស្ទីនរាប់រយនាក់ ខណៈអង្គការសហប្រជាជាតិ(UN) និយាយថា មនុស្ស ជាង ១៤ម៉ឺននាក់ ត្រូវបានជម្លៀសខ្លួន ចាប់តាំងពីសប្តាហ៍មុនរហូតមក ។

ទីភ្នាក់ងារមនុស្សធម៌អង្គការសហប្រជាជាតិ(OCHA) បាននិយាយថា ជនប៉ាឡេស្ទីន ១៤២.០០០នាក់ ត្រូវបានបង្ខំចិត្តជម្លៀសខ្លួន ចាប់តាំងពីអ៊ីស្រាអែលបើកការវាយប្រហារសារជាថ្មីលើតំបន់ហ្កាហ្សាស្ទ្រីប កាលពីថ្ងៃទី ១៨ ខែមីនា កន្លងទៅ ។

ទីភ្នាក់ងារមួយនេះ បាននិយាយកាលពីយប់ថ្ងៃអង្គារថា ការជម្លៀសខ្លួនទៅជាមួយឥវ៉ាន់ផ្ទាល់ខ្លួនតិចតួច ជនប៉ាឡេស្ទីនយ៉ាងច្រើន បច្ចុប្បន្នកំពុងស្នាក់នៅតាមផ្លូវ ត្រូវការស្បៀងអាហារខ្លាំងបំផុត ទឹកផឹក និងទីជម្រកចាំបាច់ ។

ក្រសួងសុខាភិបាលហ្កាហ្សា និយាយនៅថ្ងៃពុធនេះថា ការវាយប្រហាររបស់អ៊ីស្រាអែល បានសម្លាប់មនុស្សយ៉ាងហោច ៣៩នាក់ រួមទាំងកុមារផងដែរ និងមនុស្ស ១២៤នាក់ផ្សេងទៀត រងរបួសនៅទូទាំងតំបន់ហ្កាហ្សា ក្នុងរយៈពេល ២៤ម៉ោងចុងក្រោយនេះ ។

ការវាយប្រហារនេះដែរ ត្រូវបានគេរាយការណ៍ថាបានកើតមាននៅទីក្រុង Jabalia និងទីក្រុង Khan Younis ស្ថិតនៅភាគខាងជើងហ្កាហ្សា និងទីក្រុង Rafah ស្ថិតនៅភាគខាងត្បូងតំបន់ហ្កាហ្សា ។

នៅក្នុងទីក្រុង Jabalia យន្តហោះចម្បាំងអ៊ីស្រាអែលវាយប្រហារផ្ទះមួយខ្នង បានសម្លាប់មនុស្សយ៉ាងហោច ៨នាក់ ហើយនៅក្នុងចំណោមជនរងគ្រោះ គឺជាទារកអាយុ ៦ខែម្នាក់ ៕