ប្រធានាធិបតីអាមេរិកលោក Donald Trump បាននិយាយកាលពីថ្ងៃពុធ២៦ មីនា ថា លោកនឹងព្រមបន្ធូរបន្ថយការដំឡើងពន្ធដើម្បីសម្រេចបានកិច្ចព្រមព្រៀងជាមួយក្រុមហ៊ុនមេរបស់ TikTok គឺ ByteDance របស់ចិនក្នុងការលក់ app វីដេអូកម្សាន្តខ្លីៗ ដែលប្រើដោយជនជាតិអាមេរិកចំនួន១៧០ លាននាក់។

ក្រុមហ៊ុន ByteDance មានថ្ងៃផុតកំណត់នៅថ្ងៃទី ៥ ខែមេសា ដើម្បីស្វែងរកអ្នកទិញយកដែលមិនមែនជាជនជាតិចិនសម្រាប់បណ្ដាញសង្គម TikTok ពុំនោះប្រឈមការហាមប្រាមមិនឲ្យមានវត្តមាននៅក្នុងទឹកដីសហរដ្ឋអាមេរិកផ្អែកលើសន្តិសុខជាតិ ដែលត្រូវបានចូលជាធរមានកាលពីខែមករា ក្រោមច្បាប់ឆ្នាំ២០២៤ ។

លោក Trump បាននិយាយថា លោកសុខចិត្តពន្យាពេលកំណត់ ប្រសិនបើកិច្ចព្រមព្រៀងលើកម្មវិធីប្រព័ន្ធផ្សព្វផ្សាយសង្គមនេះ ពុំទាន់ត្រូវបានសម្រេច។

លោក Trump បានប្រាប់ក្រុមអ្នកសារព័ត៌មានកាលពីថ្ងៃពុធសប្ដាហ៍នេះថា លោកអាចនឹងផ្តល់ឱ្យពួកគេនូវការបន្ធូរបន្ថយការដំឡើងពន្ធតិចតួច ឬអ្វីមួយដើម្បីធ្វើឱ្យកិច្ចព្រមព្រៀងនោះសម្រេចបានរួចរាល់ ។ពាក់ព័ន្ធការអត្ថាធិប្បាយរបស់លោក Trump ខាងលើក្រុមហ៊ុន TikTok ពុំបានឆ្លើយតបភ្លាមៗទេ។

ការធ្វើឱ្យប្រទេសចិនយល់ព្រមលើកិច្ចព្រមព្រៀងណាមួយដើម្បីបោះបង់ការគ្រប់គ្រងអង្គភាព TikTok ដែលមានតម្លៃរាប់សិបពាន់លានដុល្លារ តែងតែជាចំណុចជាប់គាំងដ៏ធំបំផុតក្នុងការទទួលបានកិច្ចព្រមព្រៀងចុងក្រោយ។ លោក Trump បានប្រើប្រាស់គោលនយោបាយដំឡើងពន្ធ ជាឧបករណ៍ក្នុងការចរចារឲ្យលក់ TikTok នាពេលកន្លងមក៕