ក្រសួងប្រៃសណីយ៍និងទូរគមនាគមន៍ (ក.ប.ទ.) បានបញ្ជាក់ថា ប្រតិបត្តិករ​ណាដែ​លនៅ​តែ​ធ្វើ​ប្រតិបត្តិ​ការ​នៅក្នុ​ងវិស័យបច្ចេកវិទ្យាគមនាគមន៍​និងព័ត៌មាន (Information and Communication Technology - ICT) ដោយពុំមានការអនុញ្ញាត នឹងត្រូវទទួលរងពិន័យ​អន្តរការណ៍ ឬ​​បញ្ឈប់​សកម្មភាពអាជីវកម្ម ឬប្រឈមនឹង​វិធានការនានាស្របតាម​បទប្បញ្ញត្តិ​ជាធរមាន។

យោងតាមសេចក្ដីជូនដំណឹងរបស់ក្រសួងប្រៃសណីយ៍និងទូរគមនាគមន៍ (ក.ប.ទ.) បាន​ឲ្យ​ដឹង​ថា កន្លងមក ក.ប.ទ. តែងតែអនុគ្រោះ និងធ្វើការផ្សព្វផ្សាយ​ជា​ប្រចាំ​ដល់​ប្រតិបត្តិករ​ដែល​កំពុង​ធ្វើ​​ប្រតិបត្តិការនៅក្នុងវិស័យ ICT ដោយពុំមានការអនុញ្ញាត ឱ្យមកដាក់ពាក្យ​ស្នើ​សុំ​ការ​អនុញ្ញាត​បំពេញ​​ប្រតិបត្តិការពី ក.ប.ទ. ស្របតាមបទប្បញ្ញត្តិជាធរមាន។ ទោះបីជាយ៉ាងនេះក្តី ក៏​ប្រតិបត្តិករ​មួយចំនួន ពុំទាន់បានមកបំពេញកាតព្វកិច្ចស្នើសុំការអនុញ្ញាតនៅឡើយទេ ហើយ​នៅតែ​ប​ន្តធ្វើ​ប្រតិបត្តិការដោយពុំមានការអនុញ្ញាតដដែល។

យោងតាមមាត្រា ៥ នៃអនុក្រឹត្យលេខ១១០ អនក្រ.បក ចុះថ្ងៃទី២១ ខែកក្កដា ឆ្នាំ២០១៧ ស្តី​ពី​ការ​ផ្តល់ការអនុញ្ញាតប្រតិបត្តិការលើវិស័យបច្ចេកវិទ្យាគមនាគមន៍និងព័ត៌មាន បានកំណត់ថា “គ្មាន​បុគ្គល​ណាអាច​បំពេញ​ប្រតិបត្តិការ​លើ​វិស័យ​បច្ចេក​វិទ្យា​គមនាគមន៍ និង​ព័ត៌មាន​នៅ​ក្នុង​ព្រះរាជា​ណា​ចក្រកម្ពុជាទេ លើកលែងតែបុគ្គលនោះបានទទួលលិខិតអនុញ្ញាត វិញ្ញាបនបត្រ ឬអាជ្ញាបណ្ណ ពី ក.ប.ទ.”។

ក្នុងន័យនេះ ក.ប.ទ. សូមអំពាវនាវសារជាថ្មីដល់ លោក លោកស្រី ជាម្ចាស់ ឬតំណាងក្រុមហ៊ុន សហគ្រាស និងសាខាក្រុមហ៊ុនបរទេស ទាំងអស់ ដែល​កំពុង​ធ្វើ​ប្រតិបត្តិ​ការ​ដោយ​ពុំ​មាន​ការ​អនុញ្ញាត ឬមានបំណងធ្វើប្រតិបត្តិការនៅក្នុងវិស័យ ICT សូមមកដាក់ពាក្យស្នើសុំការអនុញ្ញាតពី ក.ប.ទ. ស្របតាមបទប្បញ្ញត្តិជាធរមាន តាមប្រព័ន្ធផ្តល់សេវាសាធារណៈឌីជីថល service.mptc.gov.kh (e-Registration) ចាប់ពីថ្ងៃជូនដំណឹងនេះតទៅ។

ចំពោះប្រតិបត្តិករណាដែលនៅតែធ្វើប្រតិបត្តិការនៅក្នុងវិស័យ ICT ដោយពុំមានការអនុញ្ញាត នឹង​ត្រូវ​ទទួល​រងពិន័យអន្តរការណ៍ ឬបញ្ឈប់សកម្មភាពអាជីវកម្ម ឬប្រឈមនឹង​វិធាន​ការ​នានា​ស្រប​តាម​បទ​ប្បញ្ញត្តិជាធរមាន។

ជាមួយគ្នានេះ ក.ប.ទ. ក៏បញ្ជាក់ជូនថា ប្រតិបតិករទាំងអស់​អាចទាញយកសៀវភៅមគ្គុទេសក៍ ដំណើរ​ការ​ស្នើ​សុំ​ប្រតិបត្តិការលើវិស័យប្រៃសណីយ៍ និងបច្ចេកវិទ្យាគមនាគមន៍និងព័ត៌មាន តាម​រយៈ​ប្រព័ន្ធ e-Registration តាមរយៈការស្កេន QR Code ហើយ​អាច​សាក​សួរ​ព័ត៌​មាន​បន្ថែម​តាម​​រយៈ​ទូរស័ព្ទលេខ 092 876 679៕