ប្រជាជនរ៉ូម៉ានី រាប់ពាន់នាក់បានប្រមូលផ្តុំគ្នានៅក្នុងរដ្ឋធានី ប៊ុយការ៉េស កាលពីថ្ងៃពុធ (២៦ មីនា) ដើម្បីតវ៉ាប្រឆាំងនឹងការលុបចោលការបោះឆ្នោតប្រធានាធិបតីនៅខែធ្នូ និងការហាមប្រាមបេក្ខភាពនាំមុខស្តាំនិយមជ្រុល មិនឱ្យឈរឈ្មោះបោះឆ្នោតម្តងទៀត។

ការតវ៉ានៅក្រៅទីស្នាក់ការរដ្ឋាភិបាលនៅកណ្តាលទីក្រុងប៊ុយការ៉េសនោះ បានមើលឃើញមនុស្សរាប់ពាន់នាក់ប្រមូលផ្តុំគ្នា ដោយស្រែកថា "សេរីភាព" និង "ចោរ" ដោយគ្រវីទង់ជាតិ និងផ្លុំកញ្ចែដើម្បីតវ៉ា ។

ប្រទេសសហភាពអឺរ៉ុប និងសមាជិកអង្គការណាតូ ដែលមានព្រំប្រទល់ជាប់អ៊ុយក្រែនមួយនេះ នឹងធ្វើការបោះឆ្នោតប្រធានាធិបតីពីរជុំរបស់ខ្លួនឡើងវិញ នៅថ្ងៃទី០៤ និង ១៨ ខែឧសភា បន្ទាប់ពីតុលាការធម្មនុញ្ញបានលុបចោលការបោះឆ្នោតដំបូងកាលពីខែធ្នូ ក្រោយមានការចោទប្រកាន់ពីការជ្រៀតជ្រែករបស់រុស្ស៊ី ដើម្បីគាំទ្របេក្ខភាពស្តាំនិយមជ្រុល លោក Calin Georgescu។

កាលពីដើមខែនេះ តុលាការក៏ហាមប្រាមលោក Georgescu មិនឱ្យឈរឈ្មោះម្តងទៀត ហើយលោក George Simion មេដឹកនាំគណបក្សធំទីពីររបស់រូម៉ានី គឺបក្សសម្ព័ន្ធសម្រាប់ការរួបរួមរ៉ូម៉ានី (AUR) ក្រោយមកបានក្លាយជាបេក្ខជនជំនួសឱ្យអ្នកនយោបាយស្ដាំនិយមជ្រុលប្រកាន់ជំហរតឹងរូបនោះ។

ក្រុមស្តាំនិយមជ្រុល ដែលឥឡូវនេះទទួលបានអាសនៈសភាចំនួន ៣៥% បានលាបពណ៌បក្សសំខាន់ៗរបស់រ៉ូម៉ានីថា ជួយរុញផលប្រយោជន៍ឱ្យទីក្រុងព្រុចសែល ហើយបានបង្កការភ័យខ្លាចថា ការគាំទ្ររបស់អឺរ៉ុប សម្រាប់អ៊ុយក្រែន ក្នុងការទប់ទល់នឹងរុស្ស៊ី នឹងអូសរ៉ូម៉ានីឱ្យចូលទៅក្នុងសង្រ្គាម៕