ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធាន​គណៈកម្មការ​វាយតម្លៃអង្គភាពផ្តល់សេវាសាធារណៈថ្នាក់ជាតិ មានប្រសាសន៍ថា ការងារ​កែ​ទម្រង់​រដ្ឋ​បាលសាធារណៈ ជាកិច្ចការដែលត្រូវធ្វើជាប្រចាំ ដើម្បីពង្រឹងសមត្ថភាពស្ថាប័ន បង្កើន​ប្រសិទ្ធ​ការងារឱ្យបានខ្ពស់ជាងមុន ក្នុងសមត្ថភាពប្រកួតប្រជែងជាលក្ខណៈតំបន់ និងអន្តរជាតិ។

ឯកឧត្តមបានថ្លែងបញ្ជាក់ថា ក្នុងបរិបទនៃកត្តាជះពីខាងក្រៅ ទាំងស្ថានភាព និងភូមិសាស្ត្រ​នយោបាយ ព្រមទាំងទំនាក់ទំនងអន្តរជាតិ ដែលគ្មានភាពច្បាស់លាស់ ហើយដែល​នឹង​អាច​ជះ​ឥទ្ធិពល​មក​លើកម្ពុជា ទាំងលើសេដ្ឋកិច្ច សង្គម និងនយោបាយផងនោះ យើងរឹងរឹតតែត្រូវ​គិតគូរ​ពង្រឹង​ខ្លួន​ឱ្យ​កាន់​តែច្បាស់លាស់បន្ថែមទៀត។ ផ្នែកមួយនៃភាពច្បាស់លាស់នោះគឺ ការពង្រឹង​ប្រព័ន្ធ​រដ្ឋបាលសាធារណៈរបស់កម្ពុជាឱ្យកាន់តែមានសមត្ថភាពខ្ពស់ ខ្លាំង វៃឆ្លាត និងស្អាតស្អំ»។