ការិយាល័យរបស់អ្នកតំណាងពាណិជ្ជកម្មអាមេរិកលោក Jamieson Greer បាននិយាយថា លោក Greerបានជួបពិភាក្សាប្រកបដោយភាពស្មោះត្រង់ជាមួយឧបនាយករដ្ឋមន្ត្រីចិន លោក ហ៊ើ លីហ្វឹង (He Lifeng) អំពីបញ្ហាពាណិជ្ជកម្មក្នុងអំឡុងពេលកិច្ចប្រជុំមួយតាមវីដេអូកាលពីថ្ងៃពុធ ខណៈលោកប្រធានាធិបតីអាមេរិក Donald Trump ត្រៀមដំឡើងពន្ធលើការនាំចូលរបស់ចិនបន្ថែមទៀត។

ការិយាល័យរបស់តំណាងពាណិជ្ជកម្មអាមេរិកបន្តថា លោក Greer បានគូសបញ្ជាក់អំពីគោលដៅគោលនយោបាយពាណិជ្ជកម្មរបស់លោក Trump នៅក្នុងសន្និសីទតាមវីដេអូជាមួយលោក ហ៊ើ ដោយហៅការដំឡើងពន្ធទាំងនោះថាមានបំណងលើកកម្ពស់ការវិនិយោគក្នុងស្រុក និងផលិតភាព លើកកំពស់គុណសម្បត្តិឧស្សាហកម្មរបស់សហរដ្ឋអាមេរិក ការពារកម្មករ ការពារសេដ្ឋកិច្ច និងសន្តិសុខជាតិរបស់អាមេរិក។ 

សេចក្តីថ្លែងការណ៍បាននិយាយថា លោកក៏បានសម្តែងការព្រួយបារម្ភយ៉ាងខ្លាំងអំពីអ្វីដែលលោកបានហៅថាគោលនយោបាយ និងការអនុវត្តពាណិជ្ជកម្មអយុត្តិធម៌ និងប្រឆាំងការប្រកួតប្រជែងរបស់ប្រទេសចិន ដោយហៅកិច្ចពិភាក្សានេះថាប្រកបដោយភាពស្មោះត្រង់។

ទីភ្នាក់ងារសារព័ត៌មាន Xinhua របស់ប្រទេសចិន បានរាយការណ៍ថា លោក ហ៊ើ បានសម្តែង ការព្រួយបារម្ភជាខ្លាំងជុំវិញការដំឡើងពន្ធរបស់សហរដ្ឋអាមេរិក និងកាតព្វកិច្ចពន្ធទៅវិញទៅមក ឬពន្ធបដិការ ដែលបានគ្រោងទុករបស់លោក Trump ។

ទីភ្នាក់ងារសារព័ត៌មានខាងលើ ក៏បានហៅការអំពាវនាវនេះថាជាការផ្លាស់ប្តូរទស្សនៈប្រកបដោយភពស្មោះត្រង់ និងស៊ីជម្រៅផងដែរ លើបញ្ហាសេដ្ឋកិច្ច និងពាណិជ្ជកម្មសំខាន់ៗ ដោយបន្ថែមថា ចិន និងអាមេរិក បានយល់ព្រមរក្សាទំនាក់ទំនង។

ការអំពាវនាវនេះបានកើតឡើងទន្ទឹមនឹងលោក Trump ត្រៀមដំឡើងពន្ធបដិការនៅសប្តាហ៍ក្រោយ ជាវិធានការមួយដែលត្រូវគេរំពឹងថានឹងដំឡើងពន្ធបន្ថែមទៀតលើទំនិញរបស់ចិន៕