ខណៈដែលប្រទេសយេម៉ែន ប្រារព្ធខួបលើកទី១១ នៃជម្លោះដ៏រ៉ាំរ៉ៃ អង្គការទេសន្តរប្រវេសន៍អន្តរជាតិ (IOM) ដែលជាទីភ្នាក់ងាររបស់អង្គការសហប្រជាជាតិ បានព្រមានកាលពីថ្ងៃពុធ (២៦ មីនា) ថា ការឈឺចាប់ និងទុក្ខវេទនានៅយេម៉ែន កើតមាន "មិនឈប់ឈរ" ខណៈមនុស្សជិត ២០លាននាក់ ត្រូវការជំនួយមនុស្សធម៌បន្ទាន់ដើម្បីបន្តរស់រានមានជីវិត។

អង្គការ IOM បាននិយាយនៅក្នុងសេចក្តីថ្លែងការណ៍មួយថា មនុស្សជាង ៤,៨លាននាក់ នៅតែបន្តរស់ជាជនភៀសខ្លួន ដោយមនុស្សជាច្រើនរស់នៅក្នុងជម្រកបណ្តោះអាសន្ន ដែលមានលទ្ធភាពទទួលបានអាហារ ការថែទាំសុខភាព និងការការពារមានកម្រិត។ IOM សង្កត់ធ្ងន់ថា ស្ត្រី និងកុមារបន្តប្រឈមហានិភ័យខ្ពស់នៃហិង្សា កង្វះអាហារូបត្ថម្ភ និងសុខភាពមិនល្អ ខណៈបម្រែបម្រួលអាកាសធាតុធ្វើឱ្យស្ថានភាពកាន់តែអាក្រក់។

អគ្គនាយក IOM លោកស្រី Amy Pope បាននិយាយថា "សង្រ្គាមនៅយេម៉ែន បានរសាត់បាត់ចេញពីការយកចិត្តទុកដាក់របស់ពិភពលោក ប៉ុន្តែសម្រាប់អ្នកស្រុកដែលកំពុងឆ្លងកាត់ការឈឺចាប់នេះ បានរងទុក្ខវេទនាប្រចាំថ្ងៃឥតឈប់ឈរ" ។

ទីភ្នាក់ងារនេះបាននិយាយថា ទន្ទឹមនឹងនេះដែរ ជនអន្តោប្រវេសន៍រាប់ម៉ឺននាក់ ដែលសង្ឃឹមថានឹងឆ្លងកាត់យេម៉ែន នៅតែជាប់គាំងក្នុង "ស្ថានភាពដ៏ឃោរឃៅ" ដោយមនុស្សជិត ៦០.៩០០នាក់ បានទៅដល់ប្រទេសនេះក្នុងឆ្នាំ២០២៤ តែម្នាក់ឯង ហើយភាគច្រើនពុំមានធ្យោបាយដើម្បីរស់រានមានជីវិតទេ៕