ចំហេះព្រៃដែលកំពុងឆេះរាលដាលនៅរដ្ឋ North និង South Carolina របស់សហរដ្ឋអាមេរិក បានបង្ខំឱ្យមានការជម្លៀសប្រជាជន ហើយបានជំរុញឱ្យដាក់រដ្ឋក្នុងគ្រាអាសន្ន។ នៅក្នុងតំបន់ Polk នៃរដ្ឋ North Carolina ដែលជាតំបន់រងគ្រោះខ្លាំងបំផុត ប្រជាជនប្រហែល២៥០គ្រួសារ ត្រូវបានឲ្យជម្លៀសខ្លួនចេញ ហើយយ៉ាងហោចណាស់លំនៅឋាន និងអគារចំនួន២០ខ្នង ត្រូវបានបំផ្លាញ។

ចំហេះព្រៃ ដែលបង្កឡើងដោយស្ថានភាពក្តៅស្ងួត ខ្យល់បក់ខ្លាំង និងដើមឈើដួលរលំដោយសារព្យុះ សង្ឃរា Helene បានបន្តរាលដាល។ ព្យុះសង្ឃរា ដែលបានវាយប្រហាររដ្ឋ North Carolina កាលពីចុងខែកញ្ញា ឆ្នាំ២០២៤ បានបន្សល់ទុកនូវការបំផ្លិចបំផ្លាញ និងបានឆក់យកជីវិតមនុស្សរាប់រយនាក់។

ការជម្លៀសនៅតែបន្ត ខណៈអាកាសធាតុក្តៅស្ងួតកាលពីថ្ងៃពុធសប្តាហ៍នេះ បានបង្កឱ្យមានចំហេះព្រៃកាន់តែច្រើននៅភាគខាងលិចរដ្ឋ North Carolina ។ អភិបាលរដ្ឋ លោក Josh Stein បានជំរុញឱ្យអ្នកស្រុករក្សាការប្រុងប្រយ័ត្ន ដោយនិយាយថា «សូមបន្តយកចិត្តទុកដាក់ចំពោះការជូនដំណឹងគ្រាអាសន្ន និងបទបញ្ជាជម្លៀស ដែលអ្នកចាំបាច់ត្រូវតែចាកចេញពីលំនៅឋានរបស់អ្នក»។

ចំហេះព្រៃ បាននាំឱ្យក្រសួងគុណភាពបរិស្ថាននៃរដ្ឋ North Carolina ចេញការព្រមានអំពីគុណភាពខ្យល់មិនល្អ ដោយព្រមានថាផ្សែងអ័ព្ទ និងភាគល្អិត បង្កហានិភ័យសុខភាពធ្ងន់ធ្ងរ ជាពិសេសចំពោះកុមារ មនុស្សចាស់ និងអ្នកដែលមានបញ្ហាផ្លូវដង្ហើម។