ក្រុមមនុស្សធម៌របស់អង្គការសហប្រជាជាតិ បាននិយាយដោយដកស្រង់របាយការណ៍ថា អ្នករងរបួសមួយចំនួនពីការបំផ្ទុះគ្រាប់បែកនៅទីផ្សារមួយកន្លែង ដែលបណ្តាលឱ្យមានអ្នករងរបួសរាប់រយនាក់នៅក្នុងរដ្ឋ North Darfur ប្រទេសស៊ូដង់ កំពុងស្លាប់ជាបន្តបន្ទាប់ដោយសារកង្វះការថែទាំសុខភាព។

លោក Stephane Dujarric អ្នកនាំពាក្យអគ្គលេខាធិការអង្គការសហប្រជាជាតិ លោក Antonio Guterres បាននិយាយថា «បុគ្គលិកមនុស្សធម៌របស់យើង បានប្រាប់យើងថា មានរបាយការណ៍គួរឱ្យព្រួយបារម្ភដែលថា អ្នករងរបួសមួយចំនួនបានស្លាប់ដោយសារតែខ្វះលទ្ធភាពទទួលបានការថែទាំផ្នែកវេជ្ជសាស្រ្តឲ្យទាន់ពេលវេលានៅក្នុងទីក្រុង El Fasher ជាកន្លែងដែលការហ៊ុមព័ទ្ធ និងអរិភាព នៅបន្ត ដែលបង្ខំឱ្យមណ្ឌលសុខភាពភាគច្រើន បិទទ្វារ»។

លោក Dujarric បានរាយការណ៍ថា អ្នកសម្របសម្រួលមនុស្សធម៌និងប្រជាជន របស់អង្គការសហប្រជាជាតិ នៅប្រទេសស៊ូដង់ លោកស្រី Clementine Nkweta-Salami បាននិយាយថា «ការវាយប្រហារដ៏គួរឱ្យរន្ធត់លើទីផ្សារ Tora នៅរដ្ឋ North Darfur គឺជាការរំលឹកនៃការមិនយកចិត្តទុកដាក់ និងមិនគោរពចំពោះជីវិតមនុស្ស និងច្បាប់មនុស្សធម៌អន្តរជាតិ ក្នុងអំឡុងពេលជម្លោះ» ។

លោកស្រី Nkweta-Salami បានថ្កោលទោសយ៉ាងដាច់អហង្ការចំពោះការវាយប្រហារដោយចេតនា និងមិនរើសមុខទៅលើជនស៊ីវិល។ លោកស្រីបន្តថា «ទីផ្សារ មន្ទីរពេទ្យ សាលារៀន វិហារឥស្លាម និងផ្ទះឯកជនពុំមែនជាសមរភូមិទេ»។ «ប៉ុន្តែ ជនស៊ីវិលកំពុងត្រូវបានគេសម្លាប់នៅគ្រប់ទីកន្លែង ដែលពួកគេគិតថាមានសុវត្ថិភាពបំផុត»។