លោកប្រធានាធិបតី ដូណាល់ ត្រាំ បាននិយាយកាលពីថ្ងៃពុធថា ការវាយប្រហារតាមអាកាសរបស់សហរដ្ឋអាមេរិកប្រឆាំងនឹងក្រុមហ៊ួទី នៅក្នុងប្រទេសយេម៉ែន នឹងបន្តរយៈពេលយូរ។

ទីភ្នាក់ងារសារព័ត៌មាន AFP បានរាយការណ៍ថា ការអត្ថាធិប្បាយរបស់លោក បានកើតឡើងភ្លាមៗ បន្ទាប់ពីប្រព័ន្ធផ្សព្វផ្សាយរបស់ក្រុមហ៊ួទី បាននិយាយថា សហរដ្ឋអាមេរិក បានធ្វើការវាយប្រហារថ្មី ទៅលើរដ្ឋធានីសាណា (Sanaa)។ របាយការណ៍មុននេះ បានបញ្ជាក់ថា មានការវាយឆ្មក់របស់សហរដ្ឋអាមេរិកចំនួន ១៩លើក ទៅលើកន្លែងផ្សេងទៀត នៅក្នុងប្រទេសយេម៉ែន។

សហរដ្ឋអាមេរិក បាននិយាយថា ខ្លួនបានបើកការវាយលុកយោធាប្រឆាំងនឹងក្រុមហ៊ួទី នៅថ្ងៃទី ១៥ ខែមីនា ដើម្បីបញ្ឈប់ក្រុមនេះ ពីការវាយប្រហារលើការដឹកជញ្ជូនទំនិញ នៅក្នុងសមុទ្រក្រហម ដែលជាផ្លូវពាណិជ្ជកម្មសកលដ៏សំខាន់មួយ។

ក្រុមសកម្មប្រយុទ្ធដែលគាំទ្រដោយអ៊ីរ៉ង់ បានចាប់ផ្តើមការវាយប្រហារ បន្ទាប់ពីការចាប់ផ្តើមនៃសង្រ្គាមហ្កាហ្សា ដោយអះអាងថា ពួកគេកំពុងធ្វើសកម្មភាព ក្នុងសាមគ្គីភាពជាមួយប្រជាជនប៉ាឡេស្ទីន។