អគ្គលេខាធិការអង្គការណាតូលោក Mark Rutte បាននិយាយ នៅពេលកំពុងបំពេញទស្សនកិច្ច នៅទីក្រុងវ៉ាស៊ូវី កាលពីថ្ងៃពុធថា ទាហានសហរដ្ឋអាមេរិកចំនួន ៤នាក់ បានស្លាប់ នៅក្នុងប្រទេសលីទុយអានី អំឡុងពេលហ្វឹកហាត់។

លោក Rutte បានប្រាប់អ្នកយកព័ត៌មានថា៖«ខណៈពេលដែលខ្ញុំកំពុងនិយាយ មានព័ត៌មានបានចេញផ្សាយអំពីទាហានអាមេរិក ៤នាក់ ដែលត្រូវបានសម្លាប់ នៅក្នុងឧប្បត្តិហេតុមួយ នៅក្នុងប្រទេសលីទុយអានី» ដោយបន្ថែមថា លោកមិនបានដឹងពីព័ត៌មានលម្អិតណាមួយឡើយ។

កាលពីព្រឹកថ្ងៃពុធ យោធារបស់ប្រទេសលីទុយអានី បាននិយាយថា ពួកគេកំពុងស្វែងរកទាហានអាមេរិក៤ នាក់ និងរថពាសដែកមួយគ្រឿង ដែលបានបាត់ខ្លួនកាលពីរសៀលថ្ងៃអង្គារ។

កងទ័ពអាមេរិក បាននិយាយនៅក្នុងសេចក្តីថ្លែងការណ៍មួយថា ទាហានបានហ្វឹកហាត់ នៅជិតទីក្រុង Pabrade ភាគខាងកើតប្រទេសលីទុយអានី ក្បែរព្រំដែនជាមួយប្រទេសបេឡារុស។

សេចក្តីថ្លែងការណ៍បានបញ្ជាក់ថា៖«ទាហានទាំងអស់នោះ មកពីកងពលតូចលេខ ១ កងពលធំថ្មើរជើងលេខ ៣ កំពុងធ្វើការហ្វឹកហ្វឺនយុទ្ធសាស្ត្រ នៅពេលឧប្បត្តិហេតុកើតឡើងនោះ»។