អង្គការឃ្លាំមើលសិទ្ធិមនុស្ស (HRW) បានព្រមានថា រដ្ឋធម្មនុញ្ញបណ្តោះអាសន្នរបស់ប្រទេសស៊ីរី អាចនាំឲ្យមានការពង្រឹងអំណាចផ្តាច់ការ និងរារាំងការផ្លាស់ប្តូររបស់ប្រទេសនេះ ទៅកាន់លទ្ធិប្រជាធិបតេយ្យ។

នៅក្នុងសេចក្តីថ្លែងការណ៍ដែលបានចេញផ្សាយកាលពីថ្ងៃអង្គារ ក្រុមសិទ្ធិមនុស្សនេះ បានកត់សម្គាល់ពីការបរាជ័យនៃសេចក្តីប្រកាសរដ្ឋធម្មនុញ្ញ ក្នុងការធានាឯករាជ្យភាពរបស់សភា និងតុលាការដែលមានសមាជិកនៃសាខាទាំងពីរត្រូវបានតែងតាំងដោយផ្ទាល់ ឬដោយប្រយោល ដោយប្រធានាធិបតី។

សេចក្តីប្រកាសនេះ រាប់បញ្ចូលទាំងចៅក្រមទាំង ៧រូបនៃតុលាការធម្មនុញ្ញជាន់ខ្ពស់របស់ប្រទេសស៊ីរី ព្រមទាំងមួយភាគបីនៃសភាអន្តរកាលរបស់ប្រទេសស៊ីរី ដោយពីរភាគបីដែលនៅសល់ ត្រូវបានជ្រើសរើសដោយគណៈកម្មាធិការមួយដែលត្រូវបានជ្រើសរើសដោយប្រធានាធិបតី។

អង្គការឃ្លាំមើលសិទ្ធិមនុស្ស បាននិយាយថា៖«ការរបង្កើតនូវសេចក្តីប្រកាសថ្មីរបស់ប្រទេសស៊ីរីនេះ នឹងអាចជំរុញឲ្យមានពង្រឹងការគ្រប់គ្រងបែបផ្តាច់ការ ជាជាងការសម្របសម្រួលការផ្លាស់ប្តូរពិតប្រាកដ ទៅកាន់លទ្ធិប្រជាធិបតេយ្យ ដែលមានការគោរពសិទ្ធិមនុស្ស។

រដ្ឋធម្មនុញ្ញអន្តរកាលរបស់ប្រទេសស៊ីរី ត្រូវបានអនុម័ត នៅថ្ងៃទី ១៣ ខែមីនា និងជំនួសរដ្ឋធម្មនុញ្ញឆ្នាំ ២០១២ សម័យលោកអាសាដ ដែលត្រូវបានលុបចោល បន្ទាប់ពីការផ្តួលរំលំរបបនេះ ដោយសារការវាយលុករបស់ក្រុមឧទ្ទាម ដែលដឹកនាំដោយក្រុមឧទ្ទាមឥស្លាមនិយម Hayat Tahrir Al-Sham (HTS)។