សៀមរាប៖ អាជ្ញាធរខេត្ដសៀមរាប បានរកឃើញព្រៃលិចទឹកជាង ១០០ហិកតា នៅខាងជើងបឹងទន្លេសាប ស្ថិត​នៅក្រុងសៀមរាប ត្រូវបានកាប់ទន្ទ្រានវាទយកដីធ្វើជាកម្មសិទ្ធិឯកជន និងសង្ស័យធ្វើការជួញដូរ។

អាជ្ញាធរ​ខេត្ត​សៀមរាប បាន​រក​ឃើញ​បែប​នេះ បន្ទាប់​ពី​អាជ្ញាធរ​ខេត្ត​នេះ​ដែល​​ដឹកនាំដោយឯកឧត្ដម ទៀ សីហា អភិបាលខេត្ដសៀមរាប បាន​ចុះពិនិត្យព្រៃលិចទឹកនៅថ្ងៃទី៣០ ខែវិច្ឆិកានេះ។

 ឯកឧត្ដម ទៀ សីហា មានប្រសាសន៍ថា ដី​ព្រៃ​លិច​ទឹក​ប្រហែល ១០០​ហិកតា ត្រូវ​បាន​មនុស្ស​ជិត ៥០​នាក់ កាប់​ទន្ទ្រាន​យក​ចាប់​តាំង​ពី​ឆ្នាំ​២០១៤​មក​ម៉្លេះ។ អភិបាល​ខេត្ត​រូប​នេះ បាន​បញ្ជាក់​ថា ក្រោយពីរកឃើញនិងកំណត់ជនល្មើសហើយ អាជ្ញាធបានប្ដឹងទៅតុលាការរួចហើយដែរ។

សម្រាប់​ព្រៃ​លិច​ទឹក​នៅ​ក្នុង​ស្រុក​ចំនួន ៤​ទៀត ឯកឧត្ដម ទៀ សីហា បញ្ជាក់​ថា អាជ្ញាធរ​កំពុង​ចុះ​ទៅ​ពិនិត្យ​មើល​ពី​ការ​បាត់​បង់​ព្រៃ​លិច​ទឹក បន្ទាប់​ពី​ត្រូវ​បាន​ទន្ទ្រានយក​កាន់​កាប់​ជា​កម្មសិទ្ធិ។

ឯកឧត្ដមបានបញ្ជាក់ថា ការចុះពិនិត្យលើព្រៃលិចទឹកនាពេលនេះ មានការលំបាកក្នុងការកំណត់តំបន់បន្ដិច ដោយសារទឹកជនលិចមើលមិនឃើញច្បាស់ពីតំបន់ព្រៃលិចទឹកដែលបានបាត់បង់។

អាជ្ញាធរ​ខេត្ត​សៀមរាប បាន​ចុះ​ទៅ​ពិនិត្យ​ព្រៃ​លិច​ទឹក​នៅ​តំបន់​បឹង​ទន្លេសាប បន្ទាប់​ពី​ប្រមុខ​រាជ​រដ្ឋាភិបាល​កម្ពុជា សម្ដេច​តេជោ ហ៊ុន សែន បាន​ចេញ​បញ្ជា​ទៅ​អភិបាល​ខេត្ត​ជុំ​វិញ​បឹង​ទន្លេសាប​ទាំងអស់ ​ឱ្យ​ត្រួត​ពិនិត្យ​ទៅ​លើ​ការ​កាប់​ទន្ទ្រាន​ព្រៃ​លិច​ទឹក​នៅ​ជុំ​វិញ​បឹង​ទន្លេ​សាប។

ប្រជាសហគមន៍មួយរូបនៅសង្កាត់ចុងឃ្នៀស ក្រុងសៀមរាប លោក ឡោ រ៉ន បានលើកឡើងថា ពួកគាត់មានការសប្បាយចិត្ដក្រោយពេលរាជរដ្ឋាភិបាលបានបញ្ជាឱ្យអាជ្ញាធរខេត្ដ​ទប់ស្កាត់ជនខិលខូចទន្រ្ទានយកដីព្រៃលិចទឹកនេះ។

លោក រ៉ន លើកថា កន្លងមកដីព្រៃលិចទឹករងការកាប់បំផ្លាញយ៉ាងរង្គាលដើម្បីយកដីធ្វើជាកម្មសិទ្ធិ ធ្វើស្រែប្រាំង និងលក់ដូរជាដើម។ លោកថា ការយកដីព្រៃលិចទឹកពីជនខិលខូចវិញនេះ នឹងធ្វើឱ្យមច្ឆជាតិកើនឡើងវិញនៅក្នុងបឹង​ទន្លេសាប ព្រោះព្រៃលិចទឹក មានសារៈសំខាន់សម្រាប់ជម្រកត្រីពងកូន។

បើតាមឯកឧត្ដមអភិបាលខេត្ដសៀមរាប ទៀ សីហា បានលើកឡើងថា ដីព្រៃលិចទឹកនៅខាងជើងបឹងទន្លេសាប​នាខេត្ដសៀមរាប មានជាង ១២ម៉ឺនហិកតា ក្នុងនោះ មាននៅក្នុងស្រុកជីក្រែង ស្រុកសូទ្រនិគម ស្រុកប្រាសាទបាគង ក្រុងសៀមរាប ស្រុកពួក និងស្រុកក្រឡាញ់៕ អត្ថបទ៖ សុធី