ក្រុមមន្រ្តី និងក្រុមសេវាកម្មសង្រ្គោះបន្ទាន់និយាយនៅថ្ងៃព្រហស្បតិ៍នេះថា កងកម្លាំងរុស្ស៊ី បានបើកការវាយប្រហារយានដ្រូនទ្រង់ទ្រាយធំលើទីក្រុង Kharkiv ដែលជាទីក្រុងធំបំផុតទី ២របស់អ៊ុយក្រែនកាលពីយប់ថ្ងៃពុធ បណ្តាលឲ្យមនុស្ស ៩នាក់រងរបួស និងធ្វើឲ្យមានការខូចខាតផងដែរដល់អគារលំនៅឋានប្រជាជន ។

 សេវាកម្មសង្រ្គោះបន្ទាន់ និយាយនៅលើបណ្តាញព័ត៌មានសង្គម Telegramថា ការវាយប្រហារនេះ បណ្តាលឲ្យមានអគ្គិភ័យកើតឡើង ៥កន្លែងនៅមជ្ឈមណ្ឌលទីក្រុង Kharkiv ហើយពួកគេបានបង្ហោះរូបថតសន្លឹករបស់ក្រុមភ្នាក់ងារពន្លត់អគ្គិភ័យ កំពុងព្យាយាមពន្លត់អណ្តាតភ្លើងនៅតាមគំនរបាក់បែក ។ ពួកគេថា ការវាយប្រហារនេះ បណ្តាលឲ្យមានការខូចខាតអគារលំនៅឋានធ្ងន់ធ្ងរផងដែរ ។

 អភិបាលក្រុង Kharkiv លោក Ihor Terekhov និយាយថា មាននូវយានដ្រូនយ៉ាងហោច ១២គ្រឿង បានវាយប្រហារលើទីក្រុងរបស់លោក ដែលជាគោលដៅញឹកញាប់របស់យោធារុស្ស៊ី ស្ថិតនៅចម្ងាយប្រហែល ៣០គ.មពីតំបន់ព្រំដែន ។

 លោក Terekhov និយាយថា មាននូវអគាររស់នៅរបស់អ្នកស្រុកជាច្រើន បានរងការខូចខាត រោងចក្រកម្តៅមួយកន្លែង ត្រូវបានបំផ្លាញទាំងស្រុង ហើយបច្ចប្បន្នពលរដ្ឋគ្មានប្រព័ន្ធកម្តៅប្រើប្រាស់នោះទេ ។

 សូមបញ្ជាក់ថា ទីក្រុង Kharkiv បានទប់ជាប់ការដណ្តើមគ្រប់គ្រងពីកងកម្លាំងរុស្ស៊ីនៅសប្តាហ៍ដំបូងៗនៃការវាយប្រហារពេញលេញរបស់រុស្ស៊ីលើអ៊ុយក្រែន កាលពីខែកុម្ភៈ ឆ្នាំ ២០២២ ប៉ុន្តែទីក្រុងមួយនេះ តែងតែរងការវាយប្រហារម្តងហើយម្តងទៀតដោយយានដ្រូន និងមីស៊ីល ហើយក្រោយមកកងកម្លាំងរុស្ស៊ី បានផ្លាស់ប្តូរការផ្តោតសំខាន់នៃយុទ្ធនាការសឹករបស់ពួកគេ លើតំបន់ភាគខាងកើតប្រទេសអ៊ុយក្រែនវិញ ៕