នាយករដ្ឋមន្ត្រីជប៉ុន លោក Shigeru Ishiba នៅថ្ងៃព្រហស្បតិ៍ (ទី២៧ ខែមីនា) នេះ បាននិយាយថា ទីក្រុងតូក្យូ នឹងដាក់ «គ្រប់ជម្រើសនៅលើតុ» ដើម្បីពិភាក្សាដោះស្រាយជាមួយនឹងការប្រកាសរបស់ទីក្រុងវ៉ាស៊ីនតោន ក្នុងការយកពន្ធ ២៥ភាគរយលើការនាំចូលរថយន្ត។

ប្រធានាធិបតីអាមេរិក លោក Donald Trump កាលពីថ្ងៃពុធ (ទី២៦ ខែមីនា) បានប្រកាសដំឡើងពន្ធ ២៥ភាគរយលើការនាំចូលរថយន្ត និងរថយន្តដឹកទំនិញធុនស្រាល ដែលត្រូវចាប់ផ្តើមពីសប្តាហ៍ក្រោយទៅ ដោយធ្វើឲ្យកាន់តែរីកធំទៅៗនូវសង្គ្រាមពាណិជ្ជកម្មពិភពលោក ដែលរូបលោកបានចាប់ផ្តើមបញ្ឆេះឡើង នៅពេលបានវិលទៅកាន់សេតវិមានម្ដងទៀត នៅឆ្នាំ២០២៥ នេះ។

លោក Ishiba បានប្រាប់សភាថា៖ «ជប៉ុនគឺជាប្រទេសមួយដែលកំពុងបង្កើតបាននូវចំនួនដ៏ខ្ពស់បំផុតនៃការវិនិយោគ នៅសហរដ្ឋអាមេរិក ដូច្នេះ យើងមិនយល់សោះថា តើវាសមហេតុផលទេដែល (ទីក្រុងវ៉ាស៊ីនតោន) ត្រូវអនុវត្តគោលនយោបាយដំឡើងពន្ធមិនមានការលើកលែងដល់ប្រទេសទាំងអស់បែបនេះ។ នោះ គឺជាការកិច្ចការដែលយើងកំពុងធ្វើ ហើយនឹងបន្តធ្វើទៀត»។

ដោយមិនបានបញ្ជាក់លម្អិត អំពីលទ្ធភាពនៃចំណាត់ការដែលទីក្រុងតូក្យូអាចនឹងធ្វើ លោក Ishiba បានបន្ថែមថា៖ «យើងត្រូវពិចារណាពីអ្វីដែលល្អបំផុត សម្រាប់ផលប្រយោជន៍ជាតិរបស់ប្រទេសជប៉ុន។ យើងកំពុងដាក់គ្រប់ជម្រើសនៅលើតុ ដើម្បីពិចារណាឆ្លើយតបប្រកបដោយប្រសិទ្ធភាពបំផុត»។

អ្នកវិភាគលើកឡើងថា វិធានការនេះអាចផ្ដល់ផលប៉ះពាល់យ៉ាងធ្ងន់ធ្ងរដល់សេដ្ឋកិច្ចរបស់ប្រទេសជប៉ុន ដោយសារការពឹងផ្អែកលើការនាំចេញរថយន្តទៅកាន់សហរដ្ឋអាមេរិក។ ភាគហ៊ុន នៅក្នុងក្រុមហ៊ុនផលិតរថយន្តជប៉ុន បានធ្លាក់ចុះយ៉ាងខ្លាំង អំឡុងការជួញដូរដំបូង នៅថ្ងៃទី២៧ ខែមីនានេះ។

យោងតាមទិន្នន័យរបស់ក្រសួងហិរញ្ញវត្ថុ បានឲ្យដឹងថា រថយន្តមានកម្រិត ២៨,៣ភាគរយនៃការនាំចេញសរុបរបស់ជប៉ុនទៅកាន់សហរដ្ឋអាមេរិក ក្នុងឆ្នាំ២០២៤ ដែលជាចំណែកដ៏ធំបំផុត ក្នុងចំណោមទំនិញទាំងអស់៕