ប្រធានាធិបតីអាមេរិក លោក Donald Trump បានបង្កើនការអះអាងរបស់លោក ពាក់ព័ន្ធនឹងដែនដី Greenland កាលពីថ្ងៃព្រហស្បតិ៍ (ទី២៦ ខែមីនា) ដោយនិយាយនៅមុនមានដំណើរទស្សនកិច្ចរបស់អនុប្រធានាធិបតី លោក J.D. Vance ថា សហរដ្ឋអាមេរិកចាំបាច់ត្រូវគ្រប់គ្រងកោះរបស់ប្រទេសដាណឺម៉ាកមួយនេះ ដើម្បី «សន្តិសុខអន្តរជាតិ»។

ចាប់តាំងពីឡើងកាន់អំណាច ក្នុងខែមករា លោក Trump បានទទូចម្តងហើយម្តងទៀតថា លោកចង់ឲ្យដែនដីស្វ័យគ្រប់គ្រងនេះ ស្ថិតក្រោមការកាន់កាប់របស់ទីក្រុងវ៉ាស៊ីនតោន ដោយបដិសេធមិនច្រានចោលការប្រើប្រាស់កម្លាំង ដើម្បីសម្រេចគោលបំណងនោះ។

លោក Trump បានប្រាប់អ្នកធ្វើផតឃែស្ត លោក Vince Coglianese ថា៖ «យើងត្រូវការកោះ Greenland ដើម្បីសុវត្ថិភាព និងសន្តិសុខអន្តរជាតិ។ យើងត្រូវការវា យើងត្រូវតែគ្រប់គ្រងកោះនេះ។ ខ្ញុំមិនពេញចិត្តការគ្រប់គ្រងបែបនេះឡើយ ប៉ុន្តែយើងនឹងត្រូវតែគ្រប់គ្រងវា»។

ដែនដី Greenland ដែលកំពុងស្វែងរកឯករាជ្យពីដាណឺម៉ាក មានធនធានរ៉ែ និងប្រេងដ៏ច្រើន តែការរុករកប្រេង និងអ៊ុយរ៉ាញ៉ូម ត្រូវបានហាមឃាត់។ កោះនេះក៏មានទីតាំងជាយុទ្ធសាស្ត្រ រវាងអាមេរិកខាងជើង និងអឺរ៉ុប ស្របពេលដែលមានការកើនឡើងនូវការចាប់អារម្មណ៍ពីសំណាក់សហរដ្ឋអាមេរិក ចិន និងរុស្ស៊ី នៅតំបន់អាកទិក ជាកន្លែងដែលផ្លូវសមុទ្រ បានបើកចំហ ដោយសារតែការប្រែប្រួលអាកាសធាតុ៕