សេចក្តីព្រាងនៃឯកសារគោលនយោបាយការបរទេសប្រចាំឆ្នាំរបស់ខ្លួន កាលពីថ្ងៃព្រហស្បតិ៍ (ទី២៦ ខែមីនា) បានបង្ហាញថា ប្រទេសជប៉ុនមាន «ការព្រួយបារម្ភយ៉ាងខ្លាំង» លើការបង្កើនកិច្ចសហប្រតិបត្តិការយោធា រវាងរុស្ស៊ី និងកូរ៉េខាងជើង ព្រោះទំនាក់ទំនងកាន់តែជិតស្និទ្ធ រវាងប្រទេសទាំង២ អាចប៉ះពាល់ដល់បរិយាកាសសន្តិសុខ នៅក្នុងតំបន់អាស៊ី។

បើយោងតាមសេចក្តីព្រាងដែលទទួលបានដោយសារព័ត៌មាន Kyodo (ក្យូដូ) បានឲ្យដឹងថា សៀវភៅខៀវការទូត សម្រាប់ឆ្នាំ២០២៥ នឹងរំលឹកឡើងវិញថា ជប៉ុនបានប្តេជ្ញាចិត្តក្នុងការកសាងទំនាក់ទំនងប្រកបដោយទំនុកចិត្តយ៉ាងរឹងមាំជាមួយសហរដ្ឋអាមេរិក ខណៈពេលដែលសង្កត់ធ្ងន់លើសារៈសំខាន់ពីការមាន «សន្តិភាព និងស្ថិរភាព» នៅទូទាំងច្រកសមុទ្រតៃវ៉ាន់។

អំឡុងពេលមានការលុកលុយពេញបន្ទុករបស់រុស្ស៊ីលើអ៊ុយក្រែន និងការអភិវឌ្ឍមីស៊ីល និងនុយក្លេអ៊ែររបស់កូរ៉េខាងជើង ប្រទេសទាំង២ បានចុះហត្ថលេខាលើសន្ធិសញ្ញាភាពជាដៃគូគ្រប់ជ្រុងជ្រោយ នៅក្នុងខែមិថុនា ឆ្នាំ២០២៤ ដោយទីក្រុងព្យុងយ៉ាង បានបញ្ជូនកងទ័ព និងមីស៊ីលទៅគាំទ្រកិច្ចប្រឹងប្រែងធ្វើសង្គ្រាមរបស់ទីក្រុងមូស្គូ។

នៅមុនប្រធានាធិបតីអាមេរិក លោក Donald Trump ដែលជាអ្នកសង្ស័យលើពហុភាគីនិយម និងដែលបានបន្ទន់ជំហរជាមួយទីក្រុងមូស្គូ បានត្រលប់ទៅសេតវិមានក្នុងខែមករា ជប៉ុន និងសមាជិកនៃក្រុមប្រទេសទាំង៧ (G7) ផ្សេងទៀត បានថ្កោលទោសយ៉ាងខ្លាំងក្លា ចំពោះទំនាក់ទំនងកាន់តែស៊ីជម្រៅ រវាងកងកម្លាំងរុស្ស៊ី និងកូរ៉េខាងជើង។

សេចក្តីព្រាងឯកសារនេះ បានឲ្យដឹងទៀតថា ប្រទេសជប៉ុននឹង «បន្តរួមចំណែក» ក្នុងការដោះស្រាយបញ្ហាប្រឈមនានាដែលសហគមន៍ពិភពលោកជួបប្រទះ ដោយការមានទំនងទំនងជាមួយរដ្ឋបាលរបស់លោក Trump។ ការលើកឡើងនេះសំដៅទៅលើកិច្ចប្រជុំកំពូលលើកដំបូង រវាងនាយករដ្ឋមន្ត្រី លោក Shigeru Ishiba និងលោក Trump ក្នុងទីក្រុងវ៉ាស៊ីនតោន កាលពីខែកុម្ភៈ៕