ក្រុមហ៊ុន Jaffar Express ដែលជាសេវាកម្មរថភ្លើងឆ្លងកាត់ទូទំាងប្រទេសរបស់ប៉ាគីស្ថាន បានចាប់ផ្តើមប្រតិបត្តិការឡើងវិញហើយនៅថ្ងៃព្រហស្បតិ៍នេះ ក្រោយផ្អាកអស់រយៈពេល ១៦ថ្ងៃ បន្ទាប់ពីការវាយប្រហារស្លាប់មនុស្ស និងការប្លន់នៅខេត្ត Balochistan កាលពីថ្ងៃទី ១១ ខែមីនាកន្លងទៅ ។

នៅថ្ងៃព្រហស្បតិ៍នេះ រថភ្លើងបានចាកចេញពីទីក្រុង Peshawar ស្ថិតនៅភាគខាងជើងប៉ាគីស្ថាន ឆ្ពោះទៅកាន់ទីក្រុងភាគនិរតី Quetta ដែលជារដ្ឋធានីរបស់ខេត្ត Balochistan ។

រថភ្លើងរបស់ក្រុមហ៊ុន Jaffar Express ត្រូវបានតុបតែងដោយទង់ជាតិប៉ាគីស្ថាន ប៉ោងប៉ោង និងខ្សែកំណាត់ចម្រុះពណ៌ ដើម្បីបារព្ធពិធីចាប់ផ្តើមដំណើរការសេវាកម្មរថភ្លើងឡើងវិញ ។

ក្រុមហ៊ុន Jaffar Express គឺជាសេវាកម្មរថភ្លើងតែមួយគត់ដែលធ្វើដំណើរឆ្លងកាត់ខេត្តទាំង ៤របស់ប៉ាគីស្ថាន ដោយចំណាយពេល ៣៤ម៉ោង និងធ្វើឲ្យវាក្លាយជាតំណភ្ជាប់ដ៏សំខាន់មួយនៃការដឹកជញ្ជូនសម្រាប់ប្រទេសមួយនេះ ។

គួរឲ្យដឹងថា កាលពីថ្ងៃទី ១១ ខែមីនា ក្រុមផ្តាច់ខ្លួនបានបំផ្ទុះគ្រាប់បែកផ្តាច់ផ្លូវ និងបានបាញ់រះលើរថភ្លើងរបស់ក្រុមហ៊ុន Jaffar Express ពេលដែលវាធ្វើដំណើរចេញពីទីក្រុង Quetta ទៅកាន់ទីក្រុង Peshawar ។

ក្រុមបះបោរប្រដាប់អាវុធកងទ័ពរំដោះ Baloch (BLA)ដែលជាក្រុមប្រដាប់អាវុធជនជាតិភាគតិចធំជាងគេបំផុតប្រឆាំងរដ្ឋាភិបាលប៉ាគីស្ថាន បានប្រកាសទទួលស្គាល់ការវាយប្រហារនេះ ដោយបានសម្លាប់ចំណាប់ខ្មាំង ២១នាក់ និងកងកម្លាំងសន្តិសុខ ៤នាក់ ។

កងកម្លាំងសន្តិសុខប៉ាគីស្ថាន បានសម្លាប់ក្រុមផ្តាច់ខ្លួនទាំងអស់ ៣៣នាក់ ក្រោយភាពទាល់ច្រកអស់រយៈពេលពេញ ១ថ្ងៃរួចមក ៕