លោក Stephane Dujarric គឺជាអ្នកនាំពាក្យរបស់អង្គការសហប្រជាជាតិ(UN) និយាយថា កិច្ចព្រមព្រៀងលើសេរីភាពនាវាចរណ៍នៅក្នុងសមុទ្រខ្មៅ ដើម្បីធានាដល់ការការពារនាវាស៊ីវិល និងហេដ្ឋារចនាសម្ព័ន្ធកំពង់ផែ នឹងក្លាយជាការរួមចំណែកដ៏សំខាន់ចាំបាច់មួយចំពោះសន្តិសុខស្បៀងពិភពលោក ហើយនិងខ្សែសង្វាក់ផ្គត់ផ្គង់ ។

គួរឲ្យដឹងថា សហរដ្ឋអាមេរិក បានប្រកាសកិច្ចព្រមព្រៀងដាច់ដោយឡែកពីគ្នាជាមួយអ៊ុយក្រែន និងរុស្ស៊ី កាលពីថ្ងៃអង្គារ ដើម្បីផ្អាកការវាយប្រហាររបស់ពួកគេនៅក្នុងសមុទ្រខ្មៅ ហើយនិងការវាយប្រហារលើគោលដៅថាមពលប្រទេសទាំង ២ ប៉ុន្តែវោហាសាស្រ្តពីទីក្រុងម៉ូស្គូ និងទីក្រុងគីវ លើកឡើងថា ពួកគេនៅឆ្ងាយពីគ្នានៅឡើយ ។

លោក Dujarric និយាយថា UN បាននឹងកំពុងធ្វើការឥតឈប់ឈរលើបញ្ហាមួយនេះ ជាពិសេសចាប់តាំងពីប្រមុខ UNលោក Antonio Guterres បានសរសេរលិខិតផ្ញើជូនមេដឹកនាំអ៊ុយក្រែន រុស្ស៊ី និងទួរគី កាលពីខែកុម្ភៈឆ្នាំ មុន ដើម្បីដាក់ចេញសំណើសម្រាប់ការធ្វើនាវាចរណ៍ប្រកបដោយសុវត្ថិភាព និងដោយសេរី នៅក្នុងសមុទ្រខ្មៅ ។

សូមបញ្ជាក់ថា UN និងទួរគី បានរៀបចំគំនិតផ្តួចផ្តើមសមុទ្រខ្មៅរវាងរុស្ស៊ី និងអ៊ុយក្រែនកាលពីខែកក្កដា ឆ្នាំ ២០២២ ដើម្បីអនុញ្ញាតឲ្យមានការនាំចេញសុវត្ថិភាពនូវគ្រាប់ធុញ្ញជាតិអ៊ុយក្រែន ។

ទោះបីជាយ៉ាងណាក៏ដោយ រុស្ស៊ី បានដកខ្លួនចញពីកិច្ចព្រមព្រៀងមួយនេះ កាលពីខែកក្កដា ឆ្នាំ ២០២៣ ដោយពួកគេនិយាយតវ៉ាថា ការនាំចេញស្បៀង និងជីកសិកម្មប្រឈមនឹងឧបសគ្គធ្ងន់ធ្ងរ ៕